SQO ýnıversıtetindegi áskerı kafedra jabylmaıdy

PETROPAVL. QazAqparat – M.Qozybaev atyndaǵy Soltústik Qazaqstan ýnıversıtetindegi áskerı kafedra jabylmaıdy, qazir Qorǵanys mınıstrliginde onyń jumysyn uıymdastyrý máselesi qaralyp jatyr, dep habarlaıdy QazAqparat tilshisi.

Birer kún buryn áleýmettik jelide Kozybayev University stýdentteri joǵary oqý ornynda áskerı kafedranyń jabylatyndyǵyn aıtyp, shý shyǵarǵan edi. Jastardyń aıtýynsha, olar bul oqý ornyn osy áskerı kafedra úshin tańdaǵan. Oǵan túsý medıtsınalyq anyqtama jasatqan. Áskerı kafedraǵa túskisi kelgenderdiń sany 300-den asady. Alaıda kafedra ótinishterdi qabyldamaǵan.

Osy máselege qatysty joǵary oqý ornynyń baspasóz qyzmeti jaýap berdi.

«Búginde Kozybayev University áskerı kafedrany jabý týraly máseleni qarastyryp jatqan joq. Qazirgi ýaqytta Qorǵanys mınıstrliginde onyń qyzmetin uıymdastyrý jaıy talqylanyp jatyr. Sol sebepten áskerı kafedraǵa qabyldaý ýaqytsha toqtatyldy. Aldyńǵy jyldary oqýǵa túsken stýdentter oqýlaryn áýelgi formatta aıaqtaıdy.

Stýdentter áskerı komıssarıatta medıtsınalyq komıssııadan tegin ótedi, al tıisti taldaýlardy tirkelgen jeri boıynsha emhanalarda tapsyra alady. Medıtsınalyq qyzmetke 20-25 myń teńge jekemenshik medıtsınalyq uıymdarda taldaýlardy jasatqan jaǵdaıda ǵana jumsalady», - deıdi ýnıversıtettiń baspasóz hatshysy Dıana Halımova.