SQO túrmesine sálemdeme arqyly «tramadol» men telefon kirgizilmek boldy

PETROPAVL. QazAqparat – Soltústik Qazaqstan oblysynda sottalýshyǵa arnalǵan sálemdemeden «tramadol» tabletkalary, uıaly telefon men esirtkige uqsas zat tabyldy, dep habarlaıdy QazAqparat tilshisi.

SQO boıynsha qylmystyq-atqarý júıesi departamenti baspasóz qyzmetiniń málimetinshe, óńirdegi ES-164/8 túzetý mekemesine tyıym salynǵan zattar ótkizilmek boldy. Sottalýshylardyń birine arnalǵan sálemdeme mekeme qyzmetkerleriniń kúdigin týdyrǵan. Tekserý kezinde eki shaǵyn termostan «tramadol» sıntetıkalyq analgetıktiń 20 tabletkasy, «ALTEL» jáne «Tele2» operatorlarynyń eki sim kartasy bar «Nokia» telefony, USB kabeli shyqqan. Sondaı-aq esirtkige uqsas belgisiz zat tabyldy. Mamandar ony anyqtaý úshin saraptamaǵa jiberdi.

Eger zat shyn máninde esirtki bolyp shyqsa, sálemdemeni jiberýshi QR QK-niń 297-baby («Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý») boıynsha qylmystyq jaýapkershilikke tartylady. Múlki tárkilenip, bes jyldan on jylǵa deıingi merzimge bas bostandyǵynan aıyrylýy múmkin.

Shamamen bir apta buryn osy ES-164/8 mekemesine sottalýshynyń týysy smartfondy shokolad arasyna jasyryp kirgizbek bolǵan edi. Ákimshilik quqyq buzýshylyq boıynsha hattama toltyrylyp, materıaldar sheshim shyǵarý úshin sotqa berildi.