SQO túrmesinde sottalýshyny balǵamen uryp óltirgen er adamǵa úkim shyqty

PETROPAVL. QazAqparat – Soltústik Qazaqstan oblysy Aıyrtaý aýdanyndaǵy túzeý mekemesinde bolǵan kisi óltirý faktisine sot úkim shyǵardy, dep habarlaıdy QazAqparat tilshisi.

SQO qylmystyq ister boıynsha mamandandyrylǵan aýdanaralyq sotynyń málimetinshe, byltyr 9 qarasha saǵat 05:57 kezinde Aıyrtaý aýdanyndaǵy qylmystyq atqarý júıesi departamentiniń № 51 mekemesinde adam óltirý faktisi tirkeldi.

P. esimdi sottalýshy temir balǵamen sottalǵan S-ny basynan birneshe ret uryp óltirgen.

Sottalýshynyń kinási kýágerlerdiń sózimen, beınejazbamen jáne saraptamanyń qortyndysymen dáleldendi.

Prokýror úkimderdiń jıyntyǵymen P-ny 16 jylǵa bas bostandyǵynan aıyryp, qylmystyq atqarý júıesiniń qaýipsizdigi barynsha joǵary, onyń ishinde 5 jyldy tolyq qaýipsizdik mekemesinde óteý jazasyn taǵaıyndaýdy surady.

Jábirlenýshiniń ókili de prokýrordyń ustanymymen kelisti.

«Qylmystyń bul túri asa aýyrǵa jatady, 8 jyldan 15 jylǵa deıin bas bostandyǵynan aıyrý túrinde jaza taǵaıyndaýdy kózdeıdi. Sot sottalǵannyń kináni jartylaı moıyndaýyn jazany jeńildetetin jaǵdaı retinde qabyldady, al jazasyn ótep jatyp qaıta qylmys jasaýyn aýyrlatatyn mán-jaı retinde tanydy», - delingen baspasóz habarlamasynda.

Sot úkimimen adam óltirgeni úshin P-ǵa 12 jyl bas bostandyǵynan aıyrý túrinde jaza taǵaıyndaldy.

2020 jyly Qyzyljar aýdandyq sotymen sottalǵan P.-nyń jazasyn ótemegen bóligi de esepke alyndy. Nátıjesinde ol aldaǵy 14 jylyn túrmede ótkizbek.

P. jazasyn qylmystyq-atqarý júıesiniń qaýipsizdigi barynsha joǵary mekemesinde, alǵashqy úsh jyldy tolyq qaýipsizdik mekemesinde óteıdi.

Sondaı-aq sottalǵannan jábirlenýshiniń ókiline moraldyq shyǵyn óndirip alyndy.