SQO túrmesinde kıim jáne aıaq kıim tigý tsehtary ashyldy
SQO boıynsha Qylmystyq atqarý júıesi departamenti baspasóz qyzmetiniń málimetinshe, tigin tsehtary ortasha qaýipsizdiktegi ES-164/3 mekemesi aýmaǵynda ornalasqan. Jumys oryndaryn «Eńbek-Qyzyljar» fılıaly uıymdastyrdy. Sottalǵandar qylmystyq-atqarý júıesi mekemeleriniń muqtajdyqtary úshin kıim-keshek, tósek-oryn jabdyqtaryn jáne aıaq kıim tigedi.
«Mekeme aýmaǵynda óndiristik sektordy damytýmen qatar, sottalǵandardy barynsha jumyspen qamtýdy maqsat ettik. Olardyń kópshiligin tigin mashınkasymen jumys isteýge úırettik, ıaǵnı jańa mamandyqty meńgerdi. Tótenshe jaǵdaı rejımi kezinde tigin tsehy suranysqa qaraı qorǵanys maskalaryn tigýge qatysty. Osy aralyqta olar 27 myńnan astam maska ázirledi. Daıyn ónimniń bir bóligi qylmystyq-atqarý júıesiniń, áskerı bólimniń, Polıtsııa departamentiniń qyzmetkerlerine berildi», - deıdi SQO boıynsha QAJD ES-164/3 mekemesiniń bastyǵy Tamerlan Valıev.
Onyń aıtýynsha, keıin ishki ister mınıstriniń tapsyrmasyna sáıkes qorǵanys betperdelerin tigýge qatysqan sottalǵandar syıaqymen marapattaldy.
Qazir t igin tsehtarynda jazasyn ótep jatqan 16 adam jumys isteıdi. Olardyń 12-si tiginshi, 4-eýi etikshi. Etikshilerdiń barlyǵynyń osy salada tájirıbesi bar. Aıaq kıim tigý tsehy ashylǵannan beri olar 200 jup aıaq kıimdi tigip paıdalanýǵa bergen.
«Qazirgi ýaqytta tigin jáne aıaq kıim tigý tsehtarynyń jumysshylary jazasyn óteýshilerge arnalǵan kıim men aıaq kıim tigip jatyr. Daıyn ónim QR Úkimetiniń qaýlysymen bekitilgen zattaı normalarǵa sáıkes oblys mekemeleri boıynsha sottalǵandarǵa beriletin bolady», - deıdi mekeme bastyǵy.