SQO turǵynyna zeınetaqysy esebinen nemerelerine alıment tóleý mindetteldi

PETROPAVL. QazAqparat – Soltústik Qazaqstan oblysynda sot zeınetkerge nemerelerine aı saıyn 30 myń teńge mólsherinde alıment tóleýdi mindettedi, dep habarlaıdy QazAqparat tilshisi.

SQO prokýratýrasynyń málimetinshe, er adam byltyrǵy jazdan bastap tabysynyń úshten bir bóligin nemerelerine alıment retinde berip otyrýy tıis bolǵan. Alaıda, ol óz mindetin oryndamaı, 3,7 mln teńge shamasynda qaryzy paıda bolǵan.

«Neke (erli-zaıyptylyq) jáne otbasy týraly» Qazaqstan Respýblıkasy kodeksiniń 152-babyna sáıkes kómekke muqtaj kámeletke tolmaǵan nemereler ózderiniń eńbekke qabiletti ata-analarynan, eńbekke qabiletti týǵan baýyrlarynan jáne apa-sińlilerinen qajetti qarajatty ala almaǵan jaǵdaıda alımentti sot tártibimen atasy men ájesinen alýǵa quqyly», - delingen baspasóz habarlamasynda.

Balalardyń anasynyń atasynan nemerelerin asyrap-baǵýǵa alıment tólemderin óndirip alý týraly bergen talaby bıyl 3 naýryzda Petropavldyń №2 sotynyń sheshimimen qanaǵattandyryldy, sonyń negizinde 28 qarashada atqarýshylyq is júrgizý qozǵaldy. Alıment atasynyń zeınetaqysynan aı saıyn 10 AEK – 30 630 teńge mólsherinde óndiriledi.

Jalpy, SQO-da alıment tóleýden jaltaryp júrgen 101 adam bar, olardyń jalpy bereshegi 184,3 mln teńgege jetken. Qazir oblys boıynsha 10 479 kámeletke tolmaǵan bala alıment alýshylar qatarynda.