SQO turǵyny qyrǵaýyl ósirip, ańshylyq týrızmdi damytpaq
- Jabaıy qustar fermasyn ashýǵa ne sebep boldy?
- Oblysta joq, elimizde ilýde bir kezdesetin kásippen aınalysqym keldi. Jalpy kásipkerlikke 2012 jyly bet burdym. Sol jyly lızıngke «GAZel» kóligin alyp, júk tasymalymen aınalysa bastadym. Alǵashynda jaqsy tabys taptym, keıin naryqta básekelesterim kóbeıdi. Jumys isteý qıyndaı tústi. Sol kezde jańa bıznes-ıdeıa týraly oılaı bastadym. Eki jyl basymdy qatyrdym. Óıtkeni jańa kásippen tabys taýyp qana qoımaı, odan lázzat alǵym keldi. Osylaı oı ústinde júrgenimde maǵan bir jaqsy tanysym qyrǵaýyl jubyn syıǵa tartty. Basynda mán bermedim. Keıin bul qustarǵa qyzyǵýshylyǵym oıandy. Arnaıy ádebıetter oqydym, ınternetti aqtaryp, qajetti maǵlumat aldym. Osylaısha jabaıy qustar fermasyn ashý ıdeıasy týdy.
- Qandaı jabaıy qustar ósiresizder?
- Ázirshe qyrǵaýyl ustaımyz. Búgin fermada 250-300 shaqty qus bar. Qora-qopsymyz daıyn. Jalpy bul kásipte eń qıyny qustarǵa yńǵaıly voler salý. Bir qusqa 2 sharshy metr jer qajet. Sondaı-aq, qyrǵaýyl atalyǵy 4-5 analyǵymen bólek ustaý kerek. Volerine de qoıylatyn talaptary kóp. Jalpy qyrǵaýyldyń sanyn bastapqyda myńǵa jetkizip, keıin isimiz ońǵa bassa 2-3 myń qyrǵaýyl ustamaqshymyn.
- Qyrǵaýyl qusyn kútip-baptaýdyń ereksheligi nede?
- Qyrǵaýyldyń birneshe túri bar. Mendegi tuqymy ańshylyq jáne rýmyndyq dep atalady. Olardyń salmaǵy basqalaryna qaraǵanda úlken. Ári ádemi, qaýyrsynynyń boıaýy qanyq keledi. Atalyq salmaǵy 1,8 kelige deıin barady. Sondaı-aq, asa qatty kútimdi qajet etpeıdi. Qys boıy dalada volerde turady. Olarǵa qatty aıaz túk emes, tek jeldiń ótinde jáne sýda turmasa bolǵany. Túrli aýrýlarǵa ımmýnıteti joǵary. Tamaqty da talǵamaıdy. Kókónis, jemis beremiz. Dándi daqyldardy túrli dárýmendermen aralastyryp qorektendiremiz. Shóp, tipti tartylǵan et te beremiz, jaqsy jeıdi. Tamaǵy durys bolsa tez jetiledi. Ári jaqsy jumyrtqalaıdy, jylyna 50-ge jýyq jumyrtqa salady.
- Qustardy qaı jaqtan satyp ákeldińiz?
- Eresekterin Aqmola oblysynan ákeldim. Al jumyrtqalaryn osy ózimizdiń oblysta satyp aldym. «Bastaý» memlekettik baǵdarlamasynyń túlegimin. Osy jobamdy qorǵap, sol jerde bergen grantqa ınkýbator ákeldim. Qyrǵaýyl jumyrtqalaryn sol apparattyń kómegimen bastyryp shyǵardym.
- Qyrǵaýyl etiniń emdik qasıeti baryn barlyǵyn bilemiz. Etine suranys bar ma?
- Qyrǵaýyldyń eti taýyqtykine uqsas bolǵanymen, ol sııaqty qurǵaq emes, dámdi. Gıpoallergendi et. Quramynda 13 túrli dárýmen, adam aǵzasyna qajet barlyq mıneraldy zattar bar. Qazir etin satamyz. Kelisi 2,5 myń teńge. Biraq, jańadan ashylyp jatqandyqtan klıentterimiz kóp emes. Úılerinde ósirý úshin alatyndar bar. Bolashaqta meıramhanalarmen baılanys ornatpaqshymyz. Kelissózder júrgizip jatyrmyz, ári etti úlken mólsherde jetkizýge bizdiń ázirshe qaýqarymyz jetkiliksiz.
- Basymdyqty et óndirisine bermekshisizder me?
- Qazir Reseıde ańshylyq qurýǵa arnalǵan demalys oryndaryna qyzyǵýshylyq joǵary. Ań aýlaýǵa qumar jandar bizde de jeterlik. Ańshylyq sharýashylyqtarymen birge bolashaqta qyrǵaýylǵa ańǵa shyǵýdy uıymdastyrǵym keledi. Bizdiń aýdanda bul jobany júzege asyrýǵa bolady. Óńirge týrısterdi tartýǵa qolaıly, sol Reseıdiń ańshylary da bizge kóptep keler edi. Qaı iste bolmasyn eń qıyny bastaý ǵoı. Armanymdy júzege asyrýǵa, jańa kásipti bastaýǵa qoldaý kórsetken otbasyma rızashylyǵym sheksiz. Olardyń senimi, qoldaýy maǵan kúsh beredi.
- Áńgimeńizge rahmet!