SQO turǵyndarynyń kólik salyǵy boıynsha bereshegi 300 mln teńgege jetti
«Qyzyljar – adaldyq alańy» jobalyq keńsesinde kólik salyǵyn esepteý máselesi talqylandy. SQO Sybaılas jemqorlyqqa qarsy qyzmet mamandarynyń málimetinshe, kezdesýge vedomstvo ókilderi, oblystyq memlekettik kiris departamentiniń, qalalyq kiris basqarmasynyń, oblystyq polıtsııa departamentiniń qyzmetkerleri jáne aryzy bar turǵyndar qatysty.
Búginde kólik salyǵyn esepteýde birqatar másele bar. Sonyń biri, turǵyndardyń aıtýynsha, polıtsııanyń bazasyna qate aqparattyń engizilýi.
«Kezinde mysaly, bireý satyp alý-satý kelisimsharty boıynsha kóligin satty, alaıda satyp alýshy jaýapsyzdyq tanytyp, ony polıtsııa organyna tirkegen joq. Qazir ІІM men salyq komıtetiniń bazasy ortaq. Olar sol jerden aqparat alyp, turǵyndarǵa sońǵy 5 jyl boıynsha salyqty qaıta eseptep jatyr. Saldarynan jurtta joq kólik úshin qomaqty bereshek paıda bolǵan», - deıdi SQO PD memlekettik avtoınspektory Altynbek Jamalıev.
Petropavl qalasy boıynsha memlekettik kirister basqarmasynyń jetekshisi Talǵat Salkeevtiń aıtýynsha, olar kólik salyǵyn esepteýde ókiletti organnyń málimetine súıenedi. Alaıda keıin turǵyndar kelip kóliktiń satylyp ketkendigi jóninde satyp alý-satý kelisimshartyn kórsetedi, biraq is júzinde ol kólik esepten alynbaǵan.
«Eger ókiletti organ óziniń málimetter bazasyn tártipke keltirse bolashaqta eshqandaı másele týyndamaıdy. 2018 jyly zańnamaǵa ózgeris engizildi. Qazir salyqty biz eseptep jiberýimiz kerek. Sol sebepti baryn túgendep, tártipke keltirip, qaryz shyqqandarǵa habarlama jiberdik. Nátıjesinde turǵyndardyń ótken jyldardan 300 mln teńge bereshegi bar bolyp shyqty», - deıdi Talǵat Salkeev.
Altynbek Jamalıev bazadaǵy málimetterdiń tekserilip jatqandyǵyn aıtady. Osy kúnge deıin 5 myń kólik boıynsha aqparat durystalǵan. Alaıda olardyń ishinde eskirgen, minilmeıtin kólikter de bolýy múmkin. Ol úshin avtomobıldi taýyp, tirkeý kerek. Ol qosymsha ýaqytty qajet etedi.
Kezdesý sońynda SQO boıynsha Sybaılas jemqorlyqqa qarsy is-qımyl departamentiniń adaldyq jáne preventsııa basqarmasynyń basshysy Damır Habıbýllın: «memlekettik organ qalada ne aýdanda ornalasqanyna qaramastan turǵyndardy qabyldaýǵa, olardyń ótinishterin tyńdap, máseleni sheshýge ashyq bolýy tıis», - dedi.