SQO turǵyndarynyń 90 paıyzy halyq sanaǵynan ótti
Óńirlik kommýnıkatsııalar qyzmetinde SQO-daǵy halyq sanaǵynyń aralyq qorytyndysy jarııalandy. QR Ulttyq statıstıka bıýrosynyń SQO boıynsha departamentiniń basshysy Maral Nurjaýypovanyń aıtýynsha, óńir turǵyndarynyń 90%-ǵa jýyǵy halyq sanaǵynan ótti. Keı aýdandarda naýqan aıaqtalýǵa jaqyn.
«Tutastaı alǵanda oblys turǵyndary ıntervıýerlerdi jaqsy qabyldaıdy, saýalnama suraqtaryna jaýap beredi. Biraq, ókinishke oraı, keı adamdar «Halyqqa qyzmet kórsetý ortalyǵynda barlyq aqparat bar» dep, esik ashýdan, suraqqa jaýap berýden bas tartady. Memlekettik organdardaǵy ár adam boıynsha aqparat qupııa, ony basqalar alyp paıdalana almaıdy. Sondaı-aq eshqandaı aqparattyq júıede azamattardyń dinı ustanymy, tilderdi bilýi, kommýnıkatsııalarmen qamtamasyz etilýi týraly derekter kórsetilmegen», - deıdi Maral Nurjaýypova.
Mamannyń aıtýynsha, sanaq ótkizý ádistemesine sáıkes ıntervıýerler úı-úıdi 8 qarashaǵa deıin aralamaq. Keı turǵyndar úıinde bolmaǵandyqtan, 3-4 retten barýǵa týra keledi eken.
«Bastapqy kezeńde bizde qıyndyqtar boldy, sanaq júrgizetin adamdardyń jetispeýshiliginen. Petropavl boıynsha pýl 500 adam bolsa, qazir 225 adam. Oqytý barysynda 100-den astam adamnan aıyryldyq. Bireýine eńbekaqy mólsheri unamady, shynynda da ol úlken emes – bir adamdy sanaqtan ótkizý 103 teńge turady. Endi biri planshetpen jumys isteýdi bilmedi, sebepteri kóp. Keı turǵyndar esik ashpaı, másele týyndaǵan kezde ıntervıýelerimiz ketip qaldy. Sondyqtan jergilikti atqarýshy bılikten kómek suraýǵa májbúr boldyq. Bizge kelisimshart boıynsha jumys isteıtinderdi – muǵalimderdi, sport mektepteriniń qyzmetkerlerin usyndy. Olar halyqty sanaqtan tegin ótkizbeıdi, sol úshin eńbekaqy alady. 170 stýdentti tartamyz dep josparlaǵan edik, alaıda oqý protsesine baılanysty qazir 40 stýdent qana eńbek etip júr», - deıdi departament basshysy.