SQO turǵyndaryna ınternet arqyly «jalǵan páter» usynǵan alaıaq ustaldy

PETROPAVL. QazAqparat – Soltústik Qazaqstan oblysynda polıtseıler ınternet-alaıaqtyqqa qatysty 13 qylmysty ashyp, 8-iniń aldyn aldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, óńirdiń tártip saqshylary 5-6 qarasha kúnderi «Anti-fraud» atty jedel-aldyn alý is-sharasyn ótkizdi. Maqsat – ınternet-alaıaqtyqpen kúresý. Nátıjesinde 13 qylmys ashyldy.

«Oblys turǵyndary «uzaq merzimge páterdi jalǵa beremin» degen adamǵa aldyn ala tólem jasaǵan. Aýdarylǵan somma 10 men 50 myń teńge aralyǵynda. Qiwi-ámııanǵa aqsha túskennen keıin habarlandyrý berýshimen barlyq baılanys úzilgen. Jete tekserý arqasynda kúdikti anyqtaldy. Shyǵys Qazaqstan oblysynyń 29 jastaǵy turǵynyn SQO krımınaldy polıtsııa basqarmasynyń qyzmetkerleri Shar qalasynda ustady. Ol 5 soltústikqazaqstandyqty aldap úlgeripti», - deıdi tártip saqshylary.

Qazan aıynda polıtsııaǵa úsh petropavldyq kelip, olarǵa almaǵan shaǵyn nesıe boıynsha qaryzdy jabý týraly habarlama kelgenin aıtqan. Ol úsh oqıǵa bir-birimen baılanysty bolyp shyqty. Biraz ýaqyt buryn zardap shekkender óz jeke kýálikterin oblys ortalyǵynyń 28 jastaǵy turǵynyna senip tapsyrǵan eken. Tanystaryna «qujat páterdi jalǵa alýǵa nemese aqsha aýdarymyn jasaýǵa kerek» dep aıtqan. Alaıda ınternet arqyly 50 myń teńgeden nesıe resimdelipti.

Osy eki kúdiktige qatysty sotqa deıingi tergeý bastaldy. Polıtseıler olardyń osyǵan uqsas basqa da qylmystarǵa qatystyǵyn tekserip jatyr.

«Jedel-aldyn alý is-sharasy aıasynda ınternetke monıtorıng jasaldy. Máselen, tanymal servısterde páterlerdi jalǵa berý týraly, avtokólik bólshekterin satý týraly jalǵan 8 habarlandyrý tabyldy. Taýarlar men qyzmetter óte tómen baǵamen usynylǵan, ári aldyn ala tólem jasaý kerek. Birneshe ádispen «satýshylardy» tekserdik. Sonyń eń qarapaıymy – taýarǵa beınesholý suratý. Alaıaqtar mundaı ótinishten keıin birden barlyq baılanysty úzedi. Bul habarlandyrýlardy servısterdiń ákimgerlerine aıtyp alǵyzyp tastadyq», - deıdi SQO PD krımınaldy polıtsııa basqarmasynyń asa mańyzdy ister boıynsha aǵa jedel ýákili Vıtalıı Podchernın.

Mamandardyń sózine qaraǵanda, qazir ınternet-alaıaqtyqtyń 35% shaǵyn nesıe alýmen, 30% - avtoqosalqy bólshekterge tapsyrys berýmen jáne 20% páterdi jalǵa berýmen baılanysty.

Tártip saqshylary «barlyq habarlandyrýlardy tekserip shyǵý múmkin emes» deıdi. Sol sebepti turǵyndar saqtyq sharalaryn esten shyǵarmaǵandary jón.