SQO turǵyndary tabysynyń jartysyna jýyǵyn azyq-túlikke jumsaıdy

PETROPAVL. QazAqparat – Soltústik Qazaqstan oblysy turǵyndary tapqan tabysynyń 46,2 %-yn azyq-túlikke jumsaıdy, dep habarlaıdy QazAqparat tilshisi.

SQO statıstıka departamentiniń málimetinshe, ótken jyldyń tórtinshi toqsanynda úı sharýashylyǵyn zertteý nátıjesinde turǵyndardyń aı saıynǵy adam basyna jumsalatyn qarajaty 14,5 %-ǵa óskeni anyqtalǵan. Osylaısha bir adamnyń aılyq ortasha shyǵyny 70,6 myń teńge.

Turǵyndardyń eńbekaqysynyń negizgi bóligi – 88,7 %-y tutynýshy qajettiligine jumsalady. Onyń ishinde 46,2 %-y azyq-túlikke, 29,8 %-y azyq-túliktan basqa taýarlarǵa jáne 12,7 %-y qyzmet kórsetý aqysyn tóleýge ketedi. Al 11,3 %-y materıaldyq kómek kórsetýge, alıment tóleýge, qaryz ben nesıeni jabýǵa jáne salyq tóleýge jumsalady.

«Turǵyndardyń azyq-túlikke jumsaıtyn qarajatynyń 31,1 %-y et pen et ónimderin satyp alýǵa ketedi. Ekinshi orynda nan ónimderi men túrli jarmalar tur. Oblys halqy kıim-keshekke de tabysynyń eleýli bóligin jumsaıdy. Máselen qala turǵyndary eńbekaqynyń 26,9 %-yn, aýyl turǵyndary 23,2 %-yn kıim men aıaq kıim alýǵa jaratady», - delingen habarlamada.

SQO turǵyndarynyń qyzmet kórsetýge jumsalatyn aqysynyń 37,3 %-y turǵyn úı-kommýnaldyq sharýashylyq tólemine, 33,8 %-y kólik pen baılanysqa, 8,5 %-y bilim alýǵa ketedi. Al kóńil kóterýge nebary 0,9 %-y ǵana jumsalady. Qala turǵyndarynyń aqyly qyzmetke jumsalatyn shyǵyndary aýyl turǵyndarynan 1,9 ese kóp.