SQO turǵyndary kólik salyǵy boıynsha 411 mln teńge qaryz

PETROPAVL. QazAqparat – Soltústik Qazaqstan oblysynda 15 myńnan astam adam kólik salyǵy boıynsha boryshkerler tiziminde. Olar memleketke 411 mln teńge bereshek, dep habarlaıdy QazAqparat tilshisi.

SQO memlekettik kirister departamentiniń málimetinshe, óńirde kóligi bar 90 myńnan astam adam bar. 1 sáýir kúni kólik salyǵyn tóleý merzimi aıaqtaldy. Sáýir aıynan osy kúnge deıin 6 myń turǵyn 106 mln teńgege jýyq tólem jasaǵan. Áli 15 myń kólik ıesi salyq tóleýi tıis. Olardyń 26 mamyrǵa deıin qaryzdan qutylýǵa ýaqyty bar. Keıin ótelmegen ár kúnge ósimpul qosylady.

«26 mamyrdan bastap bereshegi 1 AEK-ten asatyn boryshkerlerdiń tizimi sot oryndaýshylaryna májbúrli túrde óndirip alý úshin jiberiledi. Ýaqytynda tólemegen salyq tóleýshiniń múlkine tyıym salady, bank shottary boıynsha shyǵys operatsııalary toqtatylady», – deıdi SQO memlekettik kirister departamentiniń bólim basshysy Suńǵat Qospaev.

Mamannyń aıtýynsha, zańǵa sáıkes, sot oryndaýshylary banktegi esepshot pen múlikti buǵattaýǵa quqyly. Avtokólik ıesiniń qaryzy 40 AEK, ıaǵnı 138 myń teńgeden assa, elden shyǵýyna tyıym salynady.

Boryshker bereshegin ótegennen keıin sot oryndaýshyǵa atqarǵan qyzmeti úshin óndirilip alynǵan somanyń 25% deıingi kólemde aqy tóleýi tıis.