SQO turǵyndary eńbekaqynyń basym bóligin azyq-túlikke jumsaıdy

PETROPAVL. QazAqparat – Soltústik Qazaqstan oblysynda turǵyndardyń aı saıynǵy shyǵyny artqan. Statıstıkalyq derekter boıynsha, eńbekaqynyń basym bóligi azyq-túlikke jumsalady, dep habarlaıdy QazAqparat tilshisi.

Ulttyq statıstıka bıýrosy SQO boıynsha departamenti halyqtyń І toqsandaǵy shyǵystaryn eseptedi. Departamenttiń málimetinshe, úı sharýashylyǵyn zertteý derekteri negizge alynǵan. І toqsanda jan basyna shaqqandaǵy ortasha aqshalaı shyǵys 63 myń teńgeni quraǵan. Bul, ótken jyldyń osy kezeńimen salystyrǵanda 2% kóp.

Halyqtyń eń úlken aqshalaı shyǵysyn – tutyný shyǵystary alady, onyń úlesi 86,5%. Materıaldyq kómek, qaryz ben kredıtti tóleý, alıment, salyqtar 13,5% quraǵan.

Turǵyndardyń eńbekaqysynyń 44,2% – azyq-túlikke jumsalady. Sonyń 27,6% et jáne et ónimderin, 18,4% nan jáne jarmalardy alýǵa ketken. Azyq-túlik emes taýarlardy satyp alý shyǵysy - 25,2%, qyzmetter tólemaqysy 7,1% alady.

Mamandardyń aıtýynsha, qala jáne aýyl turǵyndarynyń azyq-túlik taýarlaryn satyp alýda ózgeshelikter bar. Qala turǵyndary etke, et ónimderine, sút pen sút ónimderine kóp qarjy jumsaıdy da, kerisinshe, nan, jarma, kondıter ónimderine jáne qantqa az shyǵyndalady.

Azyq-túlik emes taýarlardyń tobynda eńbekaqynyń basym bóligi kıim-keshekke, aıaq kıimge jumsalady, úlesi – 24,4%.

Al qyzmetter tólemaqysynyń negizgi – 35,3% turǵyn úı-kommýnaldyq qyzmetterge, 33,2% – kólik jáne baılanysqa, 9,4% densaýlyq saqtaýǵa, 6,5% bilim alýǵa ketedi. Qalalyqtardyń aýyldyqtarmen salystyrǵanda aqyly qyzmetterge shyǵyndary 2 ese kóp.