SQO turǵyndary túrmege zat kirgizý úshin qandaı aıla-amaldarǵa barady
Sálemdeme jiberýshilerdiń tapqyrlyǵy men qııalynda shek joq.
SQO Qylmystyq-atqarý júıesi departamenti baspasóz qyzmetiniń málimetinshe, tyıym salynǵan zattardy azyq-túlikke, qurylys materıaldaryna, avtokólik qaptamasyna, spýtnıktik antenna tıýnerlerine, kıim men aıaq kıimge jasyrý arqyly ótkizýdiń kúrdeli tásilderin tabady.
Keı turǵyndar uıaly telefon, SIM-karta, flesh-karta, Wi-Fi roýterlaryn jáne zarıadtaǵyshtardy qorshaýdan laqtyrý jáne kvadrokopter arqyly ótkizýge tyrysqan.
«Mańǵystaý oblysynyń, Oral, Qostanaı jáne Petropavl qalalarynyń turǵyndarynan sottalǵandarǵa joldanǵan sálemdemelerdi tekserý kezinde jalpy salmaǵy 42,87 gramm esirtki alýdyń 4 faktisi tirkeldi. Ósimdik tektes zattar temekige, et qosylǵan bes lıtrlik plastık ydystaǵy súıekte jáne jańǵaqtyń ishine jasyrylǵan. Saraptama nátıjesi boıynsha alynǵan zattar kannabıs shaıyry, marıhýana, gashısh, opıı bolyp shyqty. Jyl qorytyndysy boıynsha QR Ákimshilik quqyq buzýshylyq týraly kodekstiń 481-baby boıynsha 6 adam ákimshilik jaýapkershilikke tartyldy, onyń úsheýine aıyppul salynsa, qalǵany eskertý aldy», — deıdi SQO qylmystyq-atqarý júıesi departamentiniń rejım jáne qadaǵalaý bóliminiń bastyǵy Rýslan Jýsýpov.
Mamannyń aıtýynsha, mekeme qyzmetkerleri Ulttyq ulany akademııasynyń áskerı qyzmetshilerimen birge tyıym salynǵan zattardyń enýine jol bermeý maqsatynda ıisshil ıtti paıdalana otyryp, mekemelerge irgeles aýmaqtardy turaqty negizde patrýldeıdi.
Byltyr departamenttiń vedomstvolyq baǵynysty mekemelerinde jalpy sany 60 uıaly telefon ákelýdiń 12 faktisi tirkelgen.