SQO turaqtandyrý qoryna bıyl 3 myń tonna un jáne 1,5 myń tonna kókónis satyp almaq
SQO kásipkerlik jáne ındýstrıaldy-ınnovatsııalyq damý basqarmasynyń jetekshisi Medet Ospanov brıfıngide áleýmettik mańyzy bar azyq-túlik taýarlarynyń baǵasyn turaqtandyrýǵa qatysty atqarylyp jatqan jumysty toqtaldy.
Óńirde áleýmettik mańyzy bar azyq-túlik taýarlarynyń baǵasyn baqylaý maqsatynda monıtorıng shtaby qurylǵan. Aýmaqtyq jáne jergilikti atqarýshy organdarǵa 100 shaqty saýda oryny bekitilgen. Olar apta saıyn Petropavldaǵy jáne oblys aýdandaryndaǵy baǵaǵa monıtorıng júrgizedi. Qorytyndysy boıynsha kásipkerlik jáne ındýstrıaldy-ınnovatsııalyq damý basqarmasy taldaý júrgizip, taýar qymbattaǵan jaǵdaıda onyń sebep-saldary anyqtalady.
«Áleýmettik mańyzy bar azyq-túlik tizimine 19 taýar kiredi. Sonyń 14-i boıynsha turaqtandyrý qoryna ónim satyp alyndy. Barlyǵy – jergilikti taýar óndirýshilerden alynǵan. Turaqtandyrý qorynan dúken sórelerine qaraqumyq, kúrish, ósimdik maıy, un, makaron ónimderi, qant, tuz, qus eti, kartop, qyryqqabat, sábiz ben pııaz shyǵarylady. Bıyl qorǵa 3 myń tonna un jáne 1,5 myń tonna kókónis satyp almaqpyz», - deıdi SQO kásipkerlik jáne ındýstrıaldy-ınnovatsııalyq damý basqarmasynyń jetekshisi Medet Ospanov.
Petropavldy sút ónimderimen jergilikti iri sút zaýyttary qamtyp otyr. Olardyń baǵasy turaqty. Al un, nan jáne makaron baǵasyn turaqtandyrý úshin oblystyq ákimdik kásipkerlermen kelisimge keldi. Jumyrtqa da d ál osylaı j etkiziledi.
Bólshek saýdada qant pen suıyq maı qymbattady. Oǵan óndirýshi zaýyttardyń baǵany ósirýi sebep. Máselen Taraz ben Kóksý qant kombınattary kelisin 285 teńgeden satady.
«Baǵany turaqtandyrýdyń bir joly – apta saıyn aýyl sharýashylyǵy jármeńkesin uıymdastyrý. Ár senbi saıyn oblys ortalyǵyndaǵy úsh bazarda jármeńke ótedi. Ónim baǵasy naryqtaǵydan arzan. Sondaı-aq keı taýarǵa shekti baǵa qoıyldy. Máselen suıyq maı 562 teńgeden aspaýy kerek. Komıssııa jumyrtqa, kartop pen qyryqqabatqa osyndaı shekti baǵa engizýdi usyndy. Joba qaralyp jatyr», - deıdi Medet Ospanov.