SQO sybaılas jemqorlyq deńgeıi tómen óńirler qatarynda

PETROPAVL. QazAqparat – Soltústik Qazaqstan oblysy «Transparency Kazakhstan» qoǵamdyq qory júrgizgen zertteýdiń nátıjesi boıynsha sybaılas jemqorlyq deńgeıi tómen óńirler tizimine endi, dep habarlaıdy QazAqparat tilshisi.

«Transparency Kazakhstan» qoǵamdyq qory «Qazaqstandaǵy sybaılas jemqorlyqtyń jaı-kúıine monıtorıng» zertteýin júrgizdi.

SQO ákimdigi janyndaǵy sybaılas jemqorlyqqa qarsy is-qımyl jónindegi vedomstvoaralyq komıssııanyń múshelerine osy zertteýdiń nátıjeleri týraly SQO sybaılas jemqorlyqqa qarsy qyzmettiń basshysy Ernar Baıanǵazın aıtyp berdi.

«SQO-da azamattardyń 95,5% jáne bıznesmenderdiń 99,3% bir de bir vedomstvoda olardan syıaqy surap, máselelerdi sheshý úshin barmaq basty, kóz qystylyqqa jol berilmegenin aıtqan. Sonymen qatar, neǵurlym jemqor memlekettik mekemeler tiziminde emhanalar men aýrýhanalar, polıtsııa, salyq jáne órtke qarsy qyzmetter, jer qatynastary jáne qala qurylysy organdary, Halyqqa qyzmet kórsetý ortalyqtary, memlekettik balabaqshalar men joǵary oqý oryndary júr», - deıdi Ernar Baıanǵazın.

Respondentter máseleni beıresmı sheshýge kóp jaǵdaıda memlekettik mekemelerdiń qyzmetkerleri uıytqy bolatynyn, al árbir tórtinshide ortada deldaldar júretinin aıtqan.

Osyǵan baılanysty departament basshysy para berýshilermen qatar para alýda deldaldardyń da jaýapkershiligi kúsheıtilgenin eske saldy.

«Eger buryn «aıtarlyqtaı mólsherde para berý» qylmysy úshin eń joǵary jaza - 5 jylǵa deıin bas bostandyǵynan aıyrý bolsa jáne tıisinshe, bul áreket ortasha aýyrlyqtaǵy qylmys dep tanylsa, endi jazanyń joǵarǵy shegi 7 jylǵa deıin ulǵaıtyldy, bul qylmys avtomatty túrde aýyr sanatqa jatqyzylady. Mundaı qylmyskerlerdi shartty túrde merziminen buryn bosatýǵa jáne olarǵa jazany birden qaýipsizdigi barynsha tómen kolonııada óteýge tyıym salynǵan», - dedi SQO sybaılas jemqorlyqqa qarsy qyzmettiń jetekshisi.

Ernar Baıanǵazın kásipkerlerdiń jumysyna kedergi keltirgeni úshin jaýapkershilik júgi artqany eskertti.

Endi quqyq qorǵaý organdary qyzmetkerleri bızneske zańsyz aralasqany úshin burynǵydaı eki jyl emes, bes jylǵa deıin bas bostandyǵynan aıyrylýy múmkin.

Jalpy SQO «Transparency Kazakhstan» qoǵamdyq qory júrgizgen zertteýdiń nátıjesi boıynsha sybaılas jemqorlyq deńgeıi tómen óńirler tizimine endi.