SQO sút zaýyttaryn jańǵyrtyp, óńirdi irimshikke degen qajettilikti qamtamasyz etpek

PETROPAVL. QazAqparat – Soltústik Qazaqstan oblysynda eki sút óńdeý zaýyty jańǵyrtý jumystaryn júrgizip jatyr. Tek «Maslodel» kásiporny ǵana jetildirýge shamamen 5 mlrd teńge ınvestıtsııa quıdy, dep habarlaıdy QazAqparat tilshisi.

SQO ákimi baspasóz qyzmetiniń málimetinshe, óńir basshysy Qumar Aqsaqalov búgin óńirdegi iri kásiporyndardyń biri – «Maslodel» JShS boldy. Bul zaýyt jeltoqsan aıynda jańa jelini iske qosady. Qýaty 32 myń tonna. Jańǵyrtý jumystaryna 4,8 mlrd teńge jumsaǵan. Nátıjesinde taǵy 85 adam jumyspen qamtylady. Al kásiporynnyń qýaty 88 myńnan 120 myń tonnaǵa deıin óspek.

«Qazir oblysta sút óńdeý zaýyttary shıkizatpen 91% qamtamasyz etilgen. Shıkizatti 80 sút kesheni beredi, onyń 18-i zamanaýı. Sońǵy eki jylda 7 keshen salynsa, bıyl 12 fermanyń qurylysy jalǵasýda. Sút óndirisi taǵy 30 myń tonnaǵa óspek. Sóıtip, sút zaýyttaryn shıkizatpen 94% qamtamasyz etemiz. Jalpy qazir oblysta súttiń 46% qaıta óńdeımiz. Jańa jeliniń arqasynda bul kórsetkish 50% jetedi», - deıdi SQO ákimi Qumar Aqsaqalov.

«Maslodel» zaýyty búginde sút, qaımaq, maı, aıran, súzbe sekildi 70 ónim túrin shyǵarady. Qosymsha jeliniń arqasynda 8 jańa ónim túri naryqqa shyǵady.

Jańǵyrtý jumystary júrgizilip jatqan ekinshi kásiporyn – «Molochnyı Soıýz» zaýyty. Kásiporyn irimshik shyǵaratyn jańa jelini iske qospaq.

«Búgingi tańda oblys irimshikpen ózin 31% qamtamasyz etedi. Qazir jylyna 600 tonna óndiremiz. Jyldyq suranys – 1700 tonna. Bul defıtsıtti biz «Molochnyı Soıýz» zaýytynyń jańa jelisi iske qosylǵan kezde jabamyz. Jańa jeli jylyna 2500 myń tonna irimshik túrlerin shyǵarýǵa múmkindik bermek. Óńir naryǵy irimshikpen 100% qamtamasyz etiledi», - dedi óńir basshysy.

Jalpy 9 aıdyń qorytyndysy boıynsha óńirde 497 myń tonna sút óndirildi. Jyldyń sońyna deıin bul kórsetkishti 600 myń tonnaǵa deıin jetkizý josparlanǵan. Ótken jylmen salystyrǵanda ósim 10% quramaq.