SQO shetelden asyl tuqymdy 4,5 myń iri qara satyp alady

PETROPAVL. QazAqparat – Soltústik Qazaqstan oblysynyń fermalary mal basyn asyldandyryp jatyr. Bıyl óńirge jetkizilýi tıis 4,5 myń bastyń 3,5 myńy sharýalardyń qolyna tıgen, dep habarlaıdy QazAqparat tilshisi.

Qyzyljar aýdanyndaǵy Novonıkolskoe eldi mekenine Germanııadan golshtın tuqymdy 160 iri qara mal ákelindi. Bul shetelden jetkizilýi tıis túliktiń alǵashqy partııasy. Sútti sıyrǵa fermerler arasynda suranys joǵary. Sol sebepti jergilikti sharýalar da joldyń shalǵaılyǵyna qaramastan, ony kóptep ákelip jatyr. «Zenchenko ı K» komandıttik seriktestigi sıyrlardy sútti mal sharýashylyǵyn damytý baǵdarlamasy aıasynda satyp aldy. Bul baǵdarlama uzaq merzimge shaqtalǵan. Maqsaty - sút ónimderiniń ımportyn almastyrý.

Golshtın sıyry táýligine 50-60 lıtr sút beredi. Tek kútimi jaqsy bolýy qajet. Mamandardyń sózine qaraǵanda, bul tuqym soltústiktiń klımatyna tez jersinedi.

«Qyzyljar aýdany boıynsha jyldyń aıaǵyna deıin shetelden 1300 mal jetkiziledi. Qazir ákelgen sıyrlardy 21 kúndik karantınge qoıamyz. Asa qaýipti aýrýlardy aldyn alý úshin osylaısha ýaqytsha oqshaýlaımyz. Ákelingen ár sıyr úshin sharýashylyq 337 myń teńgeden sýbsıdııa alady. Golshtındi 2008 jyly «Zenchenko ı K» komandıttik seriktestigi Kanadadan ákele bastaǵan. Bul maldyń ónimdiligi, sút berýi óte joǵary», - deıdi Qyzyljar aýdandyq veterınarııa bóliminiń basshysy Syrǵabek Baıjanov.

Qazir «Zenchenko ı K» sharýashylyǵynda 3,5 myńǵa jýyq iri qara mal bar. Olar kúnine 70 tonna sút beredi.Jyl sońyna deıin golshtın tuqymdy taǵy 440 sıyr qosylady.

SQO aýyl sharýashylyǵy basqarmasy mamandarynyń málimetinshe, bıyl iri qara mal sany 1,7% ulǵaıyp, 367 myńǵa jetti. Onyń 198 myńy - sútti sıyr. «Sybaǵa», «Yrys» jáne sútti mal sharýashylyǵyn damytý baǵdarlamalary arqyly aǵymdaǵy jyly óńirge 4,5 myń bas asyl tuqymdy qara mal satyp alynýy tıis bolsa, búginge deıin onyń 3,5 myńy jetkizildi.