SQO sharýalary forvardtyq kelisim boıynsha 348,5 myń tonna daqyl ótkizýge tıis

PETROPAVL. QazAqparat – Soltústik Qazaqstan oblysynda aýyl sharýashylyǵy taýaryn óndirýshiler jańa astyq esebinen bıyl 18 mlrd teńgege qarjylandyryldy, olar endi dándi daqyldy 9 aýdandaǵy 19 elevatorǵa tapsyryp jatyr, dep habarlaıdy QazAqparat tilshisi.

«Azyq túlik kelisim-shart korporatsııasy» UK SQO ókildiginiń málimetinshe, bıyl óńirde forvardtyq satyp alýǵa aýyl sharýashylyǵy taýaryn óndirýshilerden 84 ótinim túsken.

Áleýmettik kásipkerlik korporatsııasynyń kepildigimen sharýashylyqtar 18,06 mlrd teńgege qarjylandyryldy. Endi olar 348 511 tonnany qaıtarýǵa tıis.

Korporatsııa tek bıdaı ǵana emes, sondaı-aq arpa, suly, zyǵyr, kúnbaǵys pen rapsty qabyldamaq.

Sonyń ishinde jumsaq bıdaıdyń shamamen 304 myń tonnasy 15 mlrd teńgege jáne qatty bıdaıdyń myń tonnasy 50 mln teńgege qabyldanady.

2 qyrkúıek kúni korporatsııa forvardtyq kelisim boıynsha astyq satyp alý úshin baǵany bekitti.

3 klasty, kilegeıligi 23 % bıdaı qosymsha qun salyǵynsyz (QQS) 91 624 teńge, QQS-pen 103 myń teńgege; 3 klasty, kilegeıligi 25 % bıdaı QQS-syz 93 750 teńge, QQS-pen 105 myń teńgege; 3 klasty, kilegeıligi 27 % bıdaı QQS-syz 95 536 teńge, QQS-pen 107 myń teńgege; 4 klasty bıdaı 87500 teńgege, QQS-pen 98 myń teńgege; 5 klasty bıdaı QQS-syz 80 357 teńgege, QQS-pen 90 myń teńgege,; klasqa jatpaıtyn bıdaı QQS-syz 75 893 teńgege, QQS-pen 85 myń teńgege; 2 klasty arpa QQS-syz 77 679 teńgege, QQS-pen 87 myń teńgege satyp alynbaq.

Sondaı-aq Azyq túlik kelisim-shart korporatsııasy 7 qyrkúıekten bastap osy baǵamen tikeleı satyp alýdy da bastady.

SQO-da dándi daqyldardy 9 aýdanda ornalasqan 19 ókiletti elevatorǵa tapsyrýǵa bolady.