SQO sharýalary Astana Agro Forum-da eki atalym boıynsha jeńimpaz atandy
Astanada agroónerkásip kesheniniń damýyna arnalǵan «ASTANA AGRO FORUM - 2018» respýblıkalyq forýmy ótti. Forým barysynda QR Premer-mınıstriniń orynbasary Ómirzaq Shúkeev 8 nomınatsııa boıynsha úzdikterdi marapattady. Onyń ishinde ekeýi - SQO ókilderi.
Oblys ákimi baspasóz qyzmetiniń málimetinshe, agroforýmda Elbasynyń tapsyrmasyna saı eńbek ónimdiligin arttyrý jáne aýyl sharýashylyǵynyń qaıta óńdelgen ónimderiniń eksportyn ulǵaıtý máseleleri qaraldy.
Agroforýmǵa SQO-nyń úlgili sharýashylyqtary da shaqyryldy. Sonyń biri - «Atameken-Agro». «Aqyldy» tehnologııalardy aýyl sharýashylyǵyna alǵashqylardyń biri bolyp engizip, endi sonyń jemisin kórip otyrǵan sharýashylyq qazir óz salasynda tsıfrlandyrý boıynsha úzdik kásiporyn bolyp esepteledi. Egis alqaptaryna mıneraldyq tyńaıtqysh sińirýde, zııankestermen, aramshóppen kúresýde, egin egý men astyq jınaýdyń ońtaıly ýaqytyn boljaýda «aqyldy» tehnologııanyń mańyzy orasan.
«Atameken-Agro» agroforýmda «AÓK-ti tsıfrlandyrýdyń kóshbasshysy» nomınatsııasyn jeńip aldy. Sharýashylyqty tsıfrlandyrýdyń nátıjesinde seriktestikte eńbek ónimdiligi sońǵy 4 jylda 2 esege artty.
Taǵy bir bas júlde bilikti dıqan Seıilbek Mahmetovke buıyrdy. Aıyrtaý aýdanyndaǵy «Babyq-Burlyq» seriktestigi «AÓK ónimi óndirisiniń rekordshysy» ataǵyna ıe boldy. Bıyl «Babyq-Burlyq» gektarynan 62,5 tsentnerden bıdaı alyp, rekordty jańalaǵan bolatyn. Jalpy, sharýashylyq boıynsha ortasha ónimdilik ár gektarǵa 40 tsentnerdi qurady.
«Babyq-Burlyqtyń» basshysy Seıilbek Mahmetov - oblystaǵy úlgi tutar azamattardyń biri. Onyń sharýashylyǵynda ortasha eńbekaqy - 141 myń teńge. Qazir Tómengi burlyq aýylynda barlyq turǵyndarǵa jaǵdaı jasalýda. Aýyldyqtardyń úılerine ortalyqtandyrylǵan jylytý júıesi tartylmaq. Kelesi jyly jumysshylarǵa úıler salynady.
Avtor: Aqerke Qabykeeva