SQO: Sergeev sý qoımasynyń sý deńgeıi túse bastady

<p>PETROPAVL. KAZINFORM &ndash; Soltústik Qazaqstan oblysyndaǵy Sergeev sý qoımasynyń sý deńgeıi ótken bir táýlikte -10 sm-ge tústi. Al óńirdegi shaǵyn ózenderde sý deńgeıi qaıtadan kóterilip jatyr.&nbsp;</p>

«Qazgıdromet» RMK SQO fılıalynyń málimetinshe, tasqyn sý Esil ózenimen Novonıkolskoe eldi mekenine jetti. Bir táýlikte munda birden 494 sm-ge kóterildi. Pokrovka aýylynyń mańynda da jaǵdaı áli kúrdeli, ótken táýlikte 105 sm-ge kóterildi. Petropavl qalasynda sý deńgeıiniń 125 sm-ge bıiktegeni tirkeldi. Sergeev sý qoımasynda sý deńgeıi birtindep túsip jatyr.

Foto: Oral Ámirenov

«Ótken táýlikte -10 sm-ge tómendedi. Biraq, ekinshi tolqyny bolady. Ázirge qanshaǵa deıin kóteriletinin aıtý qıyn. Óıtkeni Aqmolada áli kúnge kóterilip jatyr, sondaı-aq Astanadan bizge qaraı sý jiberip jatyr. Aqmola oblysyndaǵy «Kamennyı karerde» jaqsy kóterildi, birer kúnde ol bizdiń Toqsan bıde bolady.

Qazir tasqynǵa baılanysty eń kúrdeli jaǵdaı Novonıkolskoe eldi mekeninde qalyptasqan. Keshe munda muzdyń keptelisi qalyptasty. Bul sýdyń kóterilýine sebep boldy. Búgin tasqyn Prıbrejnoe eldi mekenine jetedi dep boljap otyrmyz», - deıdi fılıal dırektory Qymbat Merǵalımova.

Óńirdegi shaǵyn ózenderde ekinshi tolqyn bastalyp, sý deńgeıi kóterilip jatyr. Máselen, Gýsakovka eldi mekeni mańynda Babyqburlyq ózeni deńgeıi 31 sm-ge, Rýzaevkada Sharyq ózeni 48 sm-ge, Vozvyshenka eldi mekeni mańynda Aqanburlyq 35 sm-ge kóterilgen.

Óńirdegi Torańǵul kóliniń de sýy tolyp jatyr. Ótken táýlikte deńgeıi 10 sm-ge, jalpy sý tasqyny bastalǵaly 101 sm-ge kóterildi.

Buǵan deıin SQO ákimi Ǵaýez Nurmuhambetovtyń tasqyn sýǵa qatysty turǵyndarǵa úndeý joldaǵanyn aıtqan edik.