SQO prokýrorlary alıment tóleı almaı júrip, qumar oıynǵa qomaqty qarjy salǵandardy anyqtady

<p>PETROPAVL. KAZINFORM - Soltústik Qazaqstan oblysynyń prokýrolary alımentti qasaqana tólemeýshilerdiń jasyryn kiristerin anyqtady.</p>

SQO prokýratýrasy baspasóz qyzmetiniń habarlaýynsha, QR Bas prokýratýrasynyń tapsyrmasymen alıment tólemderi boıynsha mindettemelerdi saqtaý máselesine tekserý júrgizildi.

Alımentshiler balalaryna kóp mıllıondyq qaryzy bar bola tura, býkmekerlik keńselerde qumar oıyndarǵa kóp aqsha salyp, óz mindettemelerin elemeıtini anyqtaldy.

Mysaly, 4,7 mln teńge mólsherinde alıment boıynsha bereshegi bar boryshker, bir jyl ishinde «1xBet» býkmekerlik keńsesindegi óziniń akkaýntyn jalpy somasy 33,9 mln teńge transhpen tolyqtyryp, kórsetilgen kezeńde utys nátıjesinde 14,8 mln teńge shyǵarǵan.

Sol sııaqty, atqarýshylyq is júrgizý boıynsha taǵy bir boryshker 1,8 mln teńge alımentin tólemeı, eki jyl ishinde «Olimpbet» býkmekerlik keńsesinde 2,5 mln teńgeden aıyrylǵan.

6 boryshkerge qatysty osyndaı faktiler anyqtaldy.

«Boryshkerlerdiń býkmekerlik keńselerdegi operatsııalarynyń jalpy somasy 56 mln teńgeni qurady. Atalǵan faktiler boıynsha QK-niń 139-baby boıynsha sotqa deıingi tergep-tekserý bastaldy, baptyń sanktsııasy eki jylǵa deıin bas bostandyǵynan aıyrýdy kózdeıdi. Qylmystyq isterdi oblys prokýratýrasymen baqylaýǵa alyndy», - delingen habarlamada.

Osyǵan deıin prokýrorlar júrgizgen taldaý nátıjesinde SQO-nyń alty aýdanynda qoqys tarıfi negizsiz kóterilgeni anyqtalǵanyn jazdyq.