SQO prokýratýrasy jumyssyzdardan alıment óndirý kólemin qaıta qaraýdy usyndy

PETROPAVL. QazAqparat - SQO-nyń Qyzyljar aýdanynda bastaý alǵan «Alımentter. Tólemeýge qarsy 30 qadam» jobasynyń alǵashqy qorytyndylary jarııalandy, dep habarlaıdy «QazAqparat» HAA tilshisi oblystyq prokýratýranyń baspasóz qyzmetine silteme jasap.

Ótken jyldyń qazan aıynda aýdandyq prokýratýra mekemearalyq jumys tobymen birlesip, jobany iske asyrýǵa kirisken edi. Qyzyljar aýdanynyń sot oryndaýshylaryna 2 126 780 teńge bolatyn 391 qujat oryndaýǵa berildi.

142 problemalyq alıment tóleýshimen jumys júrgizildi. Nátıjesinde 38 boryshker jumysqa turǵyzyldy, 20 - ákimshilik jaýapkershilikke tartyldy, 7 qylmystyq is qozǵalyp, 19 boryshkerge izdeý jarııalandy.

Sonymen birge, prokýrorlar keıbir boryshkerlerdiń qaryzyn birtindep tólese de, alıment somasynyń nelikten ósip jatqanyn anyqtady.

«Sebepterdiń biri - qaryz somasy Qazaqstan Respýblıkasyndaǵy ortasha aılyq jalaqy boıynsha esepteledi. Ol 139 myń teńge. Jumys istemeıtin alıment tóleýshi aı saıyn bir balaǵa 34 760 teńge tóleýi tıis. Osylaısha, «jumyssyz» boryshker-alımentshiler 5-10 myń teńgeden bólip-bólip tólese de, qaryz somasy toqtaýsyz ósýde», - deıdi prokýrorlar.

SQO-nyń qadaǵalaýshy organy Qazaqstan Respýblıkasynyń «Atqarýshylyq is júrgizý jáne sot oryndaýshylarynyń mártebesi týraly» Zańynyń 99-baby, 3-bólimine ózgerister engizý týraly usynys ázirledi. Olar jumys istemeıtin azamattardan alıment óndirý kólemin qaıta qaraýdy jáne boryshker turatyn aımaq boıynsha ortasha aılyq jalaqyǵa oraı alıment somasyn bekitýdi usynýda.