SQO polıtsııasy júrgizýshilerge kólik shınasyn qysqyǵa aýystyrýǵa keńes berdi

PETROPAVL. QazAqparat – Jaýyn-shashyn men aýa temperatýrasynyń tómendeýine baılanysty Soltústik Qazaqstan oblysy polıtsııa departamenti oblys turǵyndary men qonaqtaryna jol júrisi qaǵıdalaryn qatań saqtaýǵa jáne avtomobıl shınalaryn qysqyǵa aýystyrýǵa keńes berdi, dep habarlaıdy QazAqparat tilshisi.

SQO PD jergilikti polıtsııa qyzmetiniń basqarmasy kólik júrgizýshilerine úndeý tastady. Tártip saqshylarynyń aıtýynsha, qazirgideı aýa raıynyń qolaısyz kezinde kólikte jazǵy shınamen júrý asa qaýipti.

«Qys mezgiliniń kelýine, aýa raıynyń búlinýine, temperatýranyń tómendep, qatqaq bolýyna baılanysty SQO polıtsııa departamenti júrgizýshilerden kóliktiń qysqy shınalaryn ýaqytynda aýystyrýyn suraıdy. Avtoshınalardy ýaqytynda aýystyrý qazirgideı qolaısyz jaǵdaıda joldaǵy senimdilikti arttyrady. Osylaısha ózin jáne basqa da jol qozǵalysyna qatysýshylardy qaýipten saqtaıdy», - dedi SQO PD patrýldik polıtsııa batalony qyzmetiniń ınspektory Rıat Andaspaev kólik júrgizýshilerine arnaǵan beınejazbada.

SQO-da ótken táýlikte kún raıy buzylyp, qar jaýdy. 22 qazan kúndiz +4 gradýs bolsa, túnde birden –3 gradýsqa deıin tómendep, qar jaýdy.

Máselen, Aıyrtaý aýdany Saýmalkól aýylynda bir túnde, turǵyndardyń aıtýynsha, 30-35 sm-ge deıin qar jaýǵan.

«Qazgıdromet» RMK málimetinshe, aldaǵy kúnderi de SQO-da kúndiz +2+4, túnde -1-4 aralyǵyndaǵy temperatýra saqtalmaq. Qatty kóktaıǵaq kútilip otyr.