SQO Polıtsııa departamentiniń basshysy depýtattar aldynda esep berdi
SQO Polıtsııa departamenti baspasóz qyzmetiniń málimetinshe, vedomstvo basshysy kóshpeli esepti Mamlıýtka qalasynda uıymdastyryp, polıtsııa qyzmetiniń ashyqtyq jáne aıqyndylyq prıntsıpi boıynsha jumysyn kórsetti. Depýtattar jınalysqa deıin aýdandyq bólimsheni aralady. Olarǵa patrýldik mashınalardyń jabdyqtalýy, tsıfrlyq tehnologııalardyń engizilý barysy, 70 kamera ornatylǵan beınebaqylaý ortalyǵynyń jumysy kórsetildi.
Sondaı-aq nspektor-kınolog Tilek Mákenov esirtki zattaryn tabýda iz kesýshi ıt Amıgonyń jumysyn kórsetti. Depýtattar Prıgorodnyı aýyldyq okrýginiń ýchaskelik polıtsııa ınspektory Qadyrbek Isınniń planshetimen tanysty. Qural kameralarǵa qosylǵan, odan tártip saqshysyna bekitilgen aýmaqty kórýge bolady. Aýdanda eki patrýldik mashına qajetti qural-jabdyqtarmen jolda qalǵandarǵa nemese sýdaǵy tótenshe jaǵdaıda kómek kórsetýge daıyn tur. Aýdandyq polıtsııa bóliminde zamanaýı front-ofıs te jumys isteıdi.
Óńirlik polıtsııa vedomstvosynyń basshysy Marat Tólebaev depýtattardy QR Prezıdentiniń Joldaýyn jáne 2019 – 2020 jyldarǵa arnalǵan ishki ister organdaryn jańǵyrtý jónindegi jol kartasyn júzege asyrý boıynsha atqarylǵan sharalar týraly habardar etti. Sondaı-aq oblystaǵy krımınogendik jaǵdaımen tanystyryp, qoǵamdyq tártipti saqtaýda, azamattardyń qaýipsizdigin qamtamasyz etýde, qylmystardy aldyn alý men ashý boıynsha júrgizilip jatqan is-sharalar týraly aqparattandyrdy.
Oblystyq máslıhattyń hatshysy Vladımır Býbenko vedomstvo jumysyna oń baǵasyn berdi.
Jyl basynan polıtsııanyń aýmaqtyq organdary jetekshileriniń, ýchaskelik polıtsııa ınspektorlarynyń qatysýymen myńnan astam kezdesý ótip, oǵan 62 myńnan astam adam qatysty. Bul turǵyndarmen «keri baılanys» ornatýda taptyrmas shara.
Kezdesý qorytyndysy boıynsha depýtattar oblys ortalyǵynda jol belgilerin ornatýǵa jáne jergilikti polıtsııa qyzmetiniń jumysyna qatysty qyzyqtyrǵan suraqtaryn qoıdy. Jalpy, halyq qalaýlylary oblystyń polıtsııa bólinisteriniń jumysyna oń baǵa berip, aldaǵy ýaqytta materıaldyq-tehnıkalyq nyǵaıtý máselelerin qoldaýǵa daıyn ekendigin bildirdi. Mamlıýt aýdany Polıtsııa bóliminiń bastyǵy Serik Áljanov qatysýshylarǵa aýdandyq polıtsııanyń bastamasymen qurylǵan aýdan jáne selolyq okrýgter qoǵamdyq keńesiniń jumysy týraly aqparat berdi. Qoǵamdyq keńestiń aralasýymen 24 adam maskúnemdikten emdelýge narkologııalyq ortalyqqa jiberildi. Іs-shara sońynda Qoǵamdyq keńestiń asa belsendi ókilderi Polıtsııa departamentiniń alǵys hatymen marapattaldy.