SQO polıtseıleri sońǵy 10 jyldaǵy eń iri esirtki partııasyn tárkiledi
SQO polıtsııa departamenti baspasóz qyzmetiniń málimetinshe, soltústikqazaqstandyq tártip saqshylary esirtki jetkizý arnasynyń jolyn kesti.
Kúdiktilerdi esirtki qylmysyna qarsy is-qımyl basqarmasynyń jedel ýákilderi quryqtady.
«Petropavl - Astana» avtojolynda tártip saqshylary «Volkswagen Passat» avtokóliginiń júrgizýshisinen kólikti toqtatýdy talap etti.
Alaıda júrgizýshi polıtseılerdiń zańdy talabyn elemeı, jasyrynbaq boldy. Kóp uzamaı jedel ýákilder avtokólikti Aqqaıyń aýdanyndaǵy Astrahanka aýylynyń mańynda toqtatty.
Kólik ishinde 29 ben 30 jastaǵy eki petropavldyq boldy. Jasy kishisi buryn esirtkiniń zańsyz aınalymymen baılanysty qylmysy úshin isti bolǵan.
Júksalǵyshtan ósimdik tektes zat salynǵan 5 qap tárkilendi. Saraptama onyń jalpy salmaǵy 128 kg keptirilgen marıhýana ekenin kórsetti. Bul asa iri mólsherge jatady.
Keıinirek tintý sharalary barysynda ustalǵandardyń biriniń garajynan 300 kg marıhýana men 21 kg 300 gr gashısh jasyrylǵan oryn anyqtaldy.
Osylaısha, tárkilengen esirtkiniń jalpy salmaǵy 464 kelini qurady.
«Bul sońǵy 10 jylda oblys polıtseıleri tárkilegen eń iri marıhýana partııasy. Atalǵan fakti QR Qylmystyq kodeksiniń 297-babynyń 3-bóligi «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha Sotqa deıingi tergep-tekserýlerdiń biryńǵaı tiziliminde tirkeldi. Kúdiktiler qamaýǵa alyndy, tergeý júrip jatyr» - deıdi SQO PD bastyǵynyń orynbasary, polıtsııa polkovnıgi Rýslan Nazarov.