SQO polıtseıleri ınternet alaıaqtyqtyń 40 oqıǵasyn tergep jatyr
SQO polıtsııa departamenti baspasóz qyzmetiniń málimetinshe, kúdiktini, 32 jastaǵy Almaty turǵynyn tamyz aıynyń ortasynda SQO-nyń krımınaldyq polıtsııa qyzmetkerleri ustady. Sol kezde ol segiz oqıǵa boıynsha kinásin moıyndaǵan edi. Alaıda jedel ýákilder er adamnyń biraz qylmysty búkkenin anyqtady. Jábirlenýshilerdiń kóbi áli de polıtsııaǵa júginbegen.
Qyzmettik issapar barysynda tártip saqshylary Qostanaıda, Aqmola men Pavlodar oblystarynyń túrli qalalarynda osy kúdiktige qatysty otyzǵa jýyq jaǵdaıdy anyqtady. Petropavlda taǵy basqa jábirlenýshiler de tabyldy. Osylaısha, búgingi tańda is boıynsha 40 epızod tirkeldi. Keltirilgen shyǵyn somalary ártúrli - 15 myń men 100 myń teńge aralyǵynda. Qazir QR Qylmystyq kodeksiniń 190-baby «Alaıaqtyq» boıynsha sotqa deıingi tergeý júrgizilip jatyr.
«Qylmysker qazirgi ýaqytta keń taraǵan stsenarıı boıynsha áreket etken. Habarlandyrý saıtyna tómen baǵamen avtokólikterge arnalǵan qosalqy bólshekterdi satý týraly habarlandyrý qaldyrǵan. Saıt ákimshiligi ınternet alaıaqtyq qaýpi týraly eskertýler ornalastyrǵanyna qaramastan, jeli qoldanýshylary onyń aılasyna boı aldyrǵan. Aldyn ala tólem alǵannan keıin qaskóı baılanysty úzedi. Adamdardan ınternet arqyly saýda jasaǵanda abaı bolýdy suraımyz. Taýar men qyzmetter úshin aldyn ala tólem jasaý talabyna kelispeý qajet. Usynylǵan taýardyń baryna kóz jetkizý úshin satýshydan qosymsha beıne sholý jasaýdy surańyz», - deıdi SQO PD krımınaldyq polıtsııa basqarmasynyń bastyǵy Petr Klımov.
Jyl basynan SQO-da polıtseıler 83 ınternet alaıaqtyqty ashty.