SQO polıtseıleri alıment tólemeı júrgen áıeldi AQSh-tan izdep tapty
SQO Polıtsııa departamenti baspasóz qyzmetiniń málimetinshe, 28-30 naýryz aralyǵynda óńir polıtseıleri boryshkerlerdi, alıment tólemeýshilerdi jáne týystyq baılanystaryn joǵaltqan tulǵalardy izdestirý boıynsha aktsııa ótkizdi. Aktsııa basynda óndiriste 75 izdestirý isi bolǵan. Onyń jartysy balalaryna alıment tóleýden jaltaryp júrgen ata-analarǵa qatysty. Bir jaǵdaıda balanyń anasy izdeýde júrgen.
Kóshi-qon qyzmeti qyzmetkerleriniń aqparaty boıynsha Qazaqstannyń 40 jastaǵy azamaty 12 jastaǵy balasyn burynǵy kúıeýine qaldyryp, ózi Reseıdiń Túmen qalasyna ketip qalǵan. Tıisti suraý salynǵannan keıin polıtseıler áıeldiń AQSh-qa qonys aýdaryp, turýǵa yqtııar hat alǵanyn anyqtaǵan. Іzdestirý jumysy nátıjesinde onyń júrgen jeri belgili boldy.
Alıment tóleýden jaltarǵan áıel jaıynda málimet jeke sot oryndaýshysyna jáne izdeý salǵan adamǵa jiberildi.
«Jalpy aktsııanyń alǵashqy kúninde izdeýde júrgen 14 adam anyqtaldy: 4 boryshker, alıment tólemeı júrgen 7 adam jáne týystyq baılanystaryn joǵaltqan 3 adam. 5 adam oblys aýmaǵynan tys jerden anyqtaldy, 2-ýi shetelde júrgen. Ara qashyqtyq jumysty qıyndata túsedi, biraq ol kedergi emes. Іzdeý jumysy udaıy negizde jalǵasady. Jalpy jyl basynan kóshi-qon qyzmetiniń barlyq úsh baǵyty boıynsha 93 adam esepte turǵan, qazirgi ýaqytta 43 adamnyń júrgen jeri anyqtaldy», - deıdi SQO Polıtsııa departamenti Kóshi-qon qyzmeti basqarmasy bastyǵynyń mindetin atqarýshy Ermek Nusyrbaev.