SQO polıtseıleri 3 kúnde 7 jasóspirimdi esepke aldy

PETROPAVL. QazAqparat – Soltústik Qazaqstan oblysynda «Jasóspirim» jedel-profılaktıkalyq is-shara aıasynda 7 jasóspirim esepke alynyp, 28 ata-ana ákimshilik jaýapkershilikke tartyldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, óńirde úsh kúndik «Jasóspirim» jedel-profılaktıkalyq is-sharasy ótti. Tártip saqshylary túnde kóshelerdi, kóńil kóterý oryndaryn jáne jastar jınalýy múmkin oryndardy tekserip, reıd uıymdastyrdy. Osy aralyqta oblysta túnde jalǵyz júrgen jasóspirimderge qatysty 125 fakti anyqtaldy. Barlyq jaǵdaıda ata-analar ákimshilik jaýapkershilikke tartyldy.

Sondaı-aq is-shara kezinde iz-tússiz joǵalǵan 17 jastaǵy jasóspirim tabyldy. Ajyrasqan erli-zaıyptynyń uly týysynyń úıinde turǵan, biraq demalystyń alǵashqy kúninde úıden ketip qalǵan. Ýaıymdaǵan áıel polıtsııaǵa habarlady.

«Bul jasóspirim buryn polıtsııanyń esebinde bolmaǵan. Ony birneshe táýlik boıy izdedik. Jasóspirimdi 9 maýsymǵa qaraǵan túni jedel ýákilder taýyp aldy. Ol qala kóshelerine shyǵyp, qańǵybastyqqa salynǵan. Bala Qyzyljar aýdanynyń Arhangelka aýylyndaǵy ómirlik qıyn jaǵdaıǵa tap bolǵan balalardy qoldaý ortalyǵyna ornalastyryldy. Esepke alynyp, mamandardyń baqylaýynda bolmaq. Oǵan qatysty materıaldardy kámeletke tolmaǵandardyń isteri jónindegi komıssııada qaraý josparlanyp otyr», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.

Budan bólek, is-shara kezinde 7 jasóspirim, 23 qolaısyz otbasy anyqtalyp, esepke qoıyldy. Kámeletke tolmaǵan balasyn tárbıeleýde mindetin oryndamaǵan 28 zańdy ókil ákimshilik jaýapkershilikke tartyldy.