SQO polıtseıi jolda qalǵan sheteldikterdi óz úıinde qonaq etti
SQO Polıtsııa departamentiniń baspasóz qyzmetinen málim etkendeı, Aqmola oblysynyń Kókshetaý qalasynan Reseıdiń Omby qalasyna bet alǵan jolaýshylar avtobýsy tańǵy saǵat 4.00 shamasynda SQO-nyń Ýálıhanov aýdanynda synyp qalǵan. Avtobýsta Reseı Federatsııasynyń 12 jolaýshysy men eki júrgizýshi bolǵan. Aýdan ortalyǵynan 40 shaqyrym jerdegi Aqtúıesaı aýylynyń mańynda turǵan jolaýshylar kóligi jaıly jergilikti turǵyndar aýdandyq polıtsııa bólimine habarlaǵan. Kómekke bólim bastyǵy Marat Áljanov, ýchaskelik polıtsııa ınspektorlary men patrýldik polıtsııa batalonynyń qyzmetkerleri kelip, barlyq jolaýshylardy shekara baqylaý pýnktine jetkizdi. Reseılikter sol jerden Omby qalasynan kelgen kólikke minip, úılerine aman-esen jetti.
Anyqtalǵandaı, kóliktiń sý nasosy isten shyqqan. Ony aýystyrý úshin polıtseıler avtobýsty jyly boksqa súırep aparǵan. Atalyp ótkendeı, mundaı qutqarý operatsııalaryna jergilikti turǵyndar men qutqarýshylar belsendi qatysady.
Sondaı-aq Taıynsha aýdanyndaǵy Vınogradovka aýlynyń mańynda «MAN» markaly júk kóligi turyp qalǵan. Kólik Túrkııa azamattaryna tıesili. Mashınanyń janar-jaǵar maı júıesi isten shyqqan. Mıronovskoe aýyldyq okrýginiń ýchaskelik polıtsııa ınspektory Talǵat Beısenbaev jolda qalǵan júrgizýshilerdi óz úıine alyp barǵan. Al ákimshilik polıtsııa bóliminiń ınspektory Azamat Oralov mashınany súırep, aýdan ortalyǵyna jetkizgen. «Sheteldikterge aýdan turǵyndary da qoldarynan kelgenshe kómektesip, jolǵa shyǵaryp saldy», - dedi Polıtsııa departamentinen.