SQO óńirge keletin dárigerlerge 2,5 mln teńge kóterme járdemaqy beredi

PETROPAVL. QazAqparat – Soltústik Qazaqstan oblysyndaǵy dáriger jetispeýshiligi máselesin sheshý úshin budan bylaı ár kelgen mamanǵa 2,5 mln teńge kótermeaqy beriletin bolyp sheshildi. Bul - ázirge respýblıka boıynsha eń joǵary soma, dep habarlaıdy QazAqparat tilshisi.

SQO ákimi Qumar Aqsaqalov halyqpen eseptik kezdesýinde óńirdegi ózekti másele - dáriger jetispeýshiligin sheshý úshin birqatar is-sharalardyń qolǵa alynǵanyn aıtty.

Sonyń biri – oblysqa kelgen ár mamanǵa 2,5 mln teńge kótermeaqy berý.

Sońǵy úsh jylda SQO-ǵa 262 jas maman kelgen. Bıyl oblystyq bıýdjet esebinen oqyǵan 24 maman rezıdentýrany bitiredi.

«Jas dárigerlerge qolaıly jaǵdaı jasap jatyrmyz. Óńirge kelgen ár mamanǵa 1,5 mln teńge kótermeaqy tólep keldik. Endi ony taǵy 1 mln teńgege arttyryp otyrmyz. Bul - el boıynsha eń joǵary soma. Sol sebepti medıtsınalyq joǵary oqý oryndarynyń túlekterin jumysqa shaqyramyn. Olarǵa munda qoldaý kórsetilip, jaǵdaı jasalady», - dedi Qumar Aqsaqalov.

Jalpy bıyl oblystyń densaýlyq saqtaý salasyna jańa qondyrǵy alýǵa 12 mlrd teńge bólindi. Bul - 2019 jylmen salystyrǵanda 4 ese kóp qarajat.

Aýrýhanalarǵa zamanaýı qondyrǵylar: MRT, kompıýterlik tomograf, tsıfrlyq mammograftar, ÝZI apparattar, rentgen, angıograftar alynyp jatyr.

Byltyr 2 jańa angıograf alyndy. Ol ınsýlt, ınfarkt alǵan naýqastarǵa kúrdeli ota jasaýǵa qajet.

Byltyr kardıoortalyq osy jańa tsıfrlyq angıografpen 1200 ota jasap, júzdegen adamnyń ómirine arasha tústi.

Jergilikti dárigerler mıǵa da ota isteı bastady.