SQO oqýshylary erteń de mektepke barmaıdy
Petropavl qalasynyń ákimdigi qatty kóktaıǵaqtyń kútilýine baılanysty mektep oqýshylary úshin sabaq erteń de qashyqtan ótkiziletinin habarlady.
Qazirgi ýaqytta oblys ortalyǵynda 50-den asa arnaıy tehnıka jumys istep jatyr. Birinshi kezekte Zarechnyı men Jumysshy kentteri jáne Oıqala men Jas Órken yqshamaýdanyndaǵy kópir men kópirge kóteriletin, túsetin joldarǵa, sondaı-aq magıstraldi joldar men jaıaý júrginshiler jolaqtaryna qum-tuz qospasy shashyldy.
Búgin saǵat 11.00 kezinde birneshe baǵyt boıynsha respýblıkalyq mańyzy bar joldar jabylyp, júk kólikteriniń qozǵalysy shektelgen bolatyn. SQO Tótenshe jaǵdaılar departamenti tús aýa joldaǵy muz erip, jaǵdaıdyń jaqsarýyna baılanysty trassalar ashylǵanyn málim etti.
Budan bólek, oblysta kóktaıǵaq saldarynan qoǵamdyq kólikterdiń jumysy da toqtatyldy.
Sınoptıkter SQO aýmaǵyna Atlantıka tsıklony áser etip jatqanyn aıtty. Saldarynan óńirde kún jylyp, jaýyn jaýdy. Al túnde ekpini sekýndyna 23 metrge deıin jetetin jel turýy múmkin.