SQO-nyń turaqtandyrý qorynda 500 tonna qant bar

PETROPAVL. QazAqparat – Soltústik Qazaqstan oblysyna 3 vagon qant kele jatyr. Budan basqa turaqtandyrý qorynda 500 tonna qant bar, dep habarlaıdy QazAqparat tilshisi.

SQO kásipkerlik jáne ındýstrıaldy-ınnovatsııalyq damý basqarmasy basshysynyń orynbasary Danııar Isaev óńirdegi qantqa qatysty jaǵdaıǵa túsinik berdi. Taýardyń bul túri oblysta jetkilikti, ıaǵnı qoldan jasalǵan dúrbeleńge erýdiń qajeti joq.

«Oblystaǵy iri kóterme saýdager «Kozlov» JK Taraz qant zaýytynan kelisin 405 teńgeden 136 tonna, ıaǵna 2 vagon, Reseıden kelisin 420 teńgeden 66 tonna - 1 vagon qant satyp aldy. Vagondar jolda kele jatyr. Aptanyń sońyna deıin taýar jetýi kerek. Jalpy óńirdegi iri saýda jelileriniń aılyq qajettiligi 82 tonnany quraıdy.

Búgingi tańda turaqtandyrý qorynda 500 tonna qant bar. Bul qant áleýmettik-kásipkerlik korporatsııasynyń saýda oryndaryna, iri saýda jelilerine, sýpermarketterge, saýda úılerine jetkiziledi. Baǵasy - 312 teńge», - deıdi Danııar Isaev.

Basqarma basshysy orynbasarynyń aıtýynsha, bul kólem qyrkúıek aıyna deıin jetedi. Biraq, sońǵy kúnderi qantqa degen suranystyń kúrt artýyna baılanysty «Azyq-túlik korporatsııasy» UK AQ taǵy 136 tonna - 2 vagon qant satyp alýǵa qosymsha kelisimshart jasady.

«Tutyný normalaryna sáıkes esepteıtin bolsaq, SQO-nyń qantqa degen aılyq qajettiligi 760 tonna. Buryn biz bólshek saýda arqyly kún saıyn 1 tonna satsaq, 10-12 naýryzda tutynýshylar 30 tonna qantty satyp áketken», - deıdi Danııar Isaev.

Naryqtaǵy baǵany turaqtandyrý úshin byltyr turaqtandyrý qoryn qarjylandyrýǵa 800-den 1,9 mlrd teńgege deıin ósti. Nátıjesinde áleýmettik mańyzy bar azyq-túlik taýarlaryn satyp alý da 1,5 ese artqan. Óńirge tek qanttyń ǵana 12 vagony jetkizildi.

Qazir áleýmettik mańyzy bar 19 azyq-túlik taýarynyń 15-i SQO-da óndiriledi.