SQO-nyń tergeý ızolıatorynda daýys berý qalaı ótip jatyr
Referendým ýchaskesi Petropavldaǵy Zarechnyı kentiniń qylmystyq atqarý júıesi departamentiniń ES-164/1 mekemesinde ornalasqan. № 656 referendým ýchaskesine 45 sharshy metr aýmaq akt zalynda bólingen. Barlyq qajetti jıhazben, kerek-jaraqpen jabdyqtalyp, jasyryn daýys berýge arnalǵan kabınkalar, statsıonarlyq saılaý jáshikteri qoıylǵan.
«Mekememizdiń ákimshilik bóliginde ornalasqan ýchaskede barlyq qaýipsizdik talaptary saqtalǵan. Daýys berý orny órt qaýipsizdigi jáne ózge de tehnıkalyq nusqaýlyqtarǵa saı jabdyqtalǵan. Jasyryn daýys berýge arnalǵan kabınalardyń barlyǵy aldyn ala tekserildi. Eki statsıonarlyq beınebaqylaý kamerasy ornatyldy, jeke quramdy ornalastyrý ázirlendi, tergeý barysyna qamaýǵa alynǵandardy kameralardan saılaý ýchaskesine shyǵarý shemasy bekitildi», - deıdi ES 164/1 mekemesiniń bastyǵy Rústem Saǵdenov.
SQO qylmystyq-atqarý júıesi departamenti baspasóz qyzmetiniń málimetinshe, bul referendým ýchaskesi – jabyq. Mekeme aýmaǵynda daýys berýge sot úkimi zańdy kúshine enbegen kúdiktiler, aıyptalýshylar jáne tergeý barysyna qamaýǵa alynǵandar qatysady. Búgin mekemede daýys berip jatqan eń jas sottalǵan – 19-da. Mudar Maǵıev buzaqylyq jasaǵany úshin isti bolǵan. Al eń ereseginiń jasy – 75-te.
«Úkimderi zańdy kúshine engen sottalǵandardyń jalpyǵa birdeı saılaý quqyǵy bolmaıdy. Qazir 4 maýsym boıynsha arnaıy kontıngent sany 211 adam, onyń ishinde: daýys berý quqyǵy bar – 155 adam otyr. Olardyń 50-i úkimniń zańdy kúshine enýin kútken sottalǵandar; 105-i qamaýdaǵy-tergeýindegiler. Jeke basyn kýálandyratyn qujattary joq adamdar tolyq kólemde qujattaldy», - deıdi SQO boıynsha qylmystyq-atqarý júıesi departamentiniń bastyǵy Rýstan Ahmetjanov.