SQO-nyń shalǵaıdaǵy Qýlykól aýylynda jańa ýchaskelik polıtsııa pýnkti ashyldy

PETROPAVL. QazAqparat – Soltústik Qazaqstan oblysynyń Qýlykól aýylynda jańa ýchaskelik polıtsııa pýnkti paıdalanýǵa berildi. Onyń ereksheligi – ǵımarattyń bir bóliginde tártip saqshysyna arnalǵan úı-jaı bar, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Aqjar aýdanyndaǵy Qýlykól aýyly Petropavldan 350 shaqyrym jerde ornalasqan. Buryn Qýlykól men Qarashilik aýyldaryna basqa okrýgtiń ýchaskelik ınspektory qyzmet kórsetti. Endi jańa nysannyń berilýimen munda jańa ýchaskelik polıtsııa ınspektory da taǵaıyndalǵan.

Eldimekenniń ómiri men turmysyna beıjaı qaramaıtyn aýyldyqtar osy úıdiń salynýyna bastamashy bolǵan. Olar úshin qyzmettik úıdiń ashylýy –kópten kútken jańalyq. Tártip saqshysy turǵyndardyń aryz-shaǵymyna jyldam den qoıa qoıyp, sharalar qabyldaı alady. Osylaısha, polıtsııa qyzmeti halyq úshin qoljetimdi bolmaq.

Jalpy aýmaǵy 90 sharshy metrden asatyn eki bólmeli úı barlyq kommýnıkatsııalarmen jabdyqtalǵan. Nysan bıýdjettik qarajatqa salyndy. Jergilikti kásipker Rústem Muhamedıev mańaıyn abattandyrýǵa kómektesti. Úıdi salýǵa atsalysqany úshin demeýshi jáne aýdannyń basqa belsendi turǵyndary, quqyqtyq tártipti qamtamasyz etip júrgen polıtseıler aýdan ortalyǵy Talshyq aýylynda marapattaldy.

«Aýyldy jerde jıi jasalatyn qylmys – mal urlyǵy. Sharýanyń baǵyp otyrǵan maly – aýyl turǵyndary úshin tabys pen kúnkóris kózi. 2019 jyly mal urlyǵy aýyr sanattaǵy qylmys túrine jatqyzyldy jáne qylmys túri retinde qaralatyn boldy. Nátıjesinde oblysta mal urlyǵynyń sany tórt esege tómendedi», - dedi aýyldyqtarmen kezdesken SQO PD bastyǵy Aıdyn Qabduldınov.

Keıin SQO PD bastyǵy azamattardy jeke máselelerimen qabyldap, polıtsııa bóliminiń jeke quramymen kezdesti.

Qýlykól aýylyndaǵy polıtsııa pýnkti – SQO-da paıdalanýǵa berilip otyrǵan osyndaı segizinshi nysan. Mundaı qyzmettik úımen biriktirilgen keńselerdi basqa aýdandarda da salý josparlanǵan.