SQO-nyń órt sóndirýshileri arasynda úzdikter anyqtaldy

PETROPAVL. QazAqparat – Soltústik Qazaqstan oblysynda Tótenshe jaǵdaılar departamentiniń «Órt sóndirý jáne apattyq-qutqarý jumystary qyzmeti» memlekettik mekemesiniń bólimsheleri arasynda úzdikter anyqtaldy, dep habarlaıdy QazAqparat tilshisi.

Qutqarýshylar «Gaz-tútinnen qorǵaý qyzmetiniń ozat býyny», «Úzdik gaz-tútinnen qorǵaýshy» ataǵy úshin synǵa tústi.

SQO Tótenshe jaǵdaılar departamenti baspasóz qyzmetiniń pikirinshe, órt sóndirýshiler úshin mundaı jarystardyń mańyzy zor. Olar kásibı sheberlikterin shyńdaıdy, fızıkalyq daıyndyqtaryn pysyqtaıdy. Óıtkeni órt aımaǵyna eń alǵashqylardyń biri bolyp gaz-tútinnen qorǵaýshylar aıaq basyp, qalyń tútin ishinde adamdardy izdep, olardyń ómirin qutqarady. Bıyl jarysqa 16 komanda qatysyp jatyr. Árqaısysynda – 4 adamnan.

Jarys úsh kezeńnen turdy. Aldymen, órt sóndirýshilerdiń psıhologııalyq daıyndyǵy synǵa tústi. Qutqarýshylar ot jolaǵy arqyly ótti. Kelesi kezeńde ár býyn birigip, tas qarańǵyda, qalyń tútinde jylý-tútin kameralarynan ótýi tıis boldy. Olarǵa órt shyqqan jerdi taýyp, ony joıyp, zardap shekkenderdi evakýatsııalaý mindeti júkteldi. Odan keıin jarys fýnktsıonaldy órt kópsaıysy boıynsha jalǵasty.

Qatysýshylardyń aıtýynsha, osyndaı jarystarda eń qıyny – psıhologııalyq kedergilerden ıaǵnı, qalyń qoıý tútinge toly tastaı qarańǵy bólmeden manekendi taýyp alyp, janý oshaǵyn joıyp ótý. Bul jerde gaz-tútinnen qorǵaý qyzmeti býynynyń birlese áreket etýi asa mańyzdy.

Jarys qorytyndysy boıynsha Petropavl qalasynyń №2 mamandandyrylǵan órt sóndirý bóliminiń mamandary jeńip, «Gaz-tútinnen qorǵaý qyzmetiniń ozat býyny» ataǵyna ıe boldy. Al Petropavl qalalyq №5-ÓSB órt sóndirýshisi Baqyt Merekenov «Úzdik gaz-tútinnen qorǵaýshy» atandy.