SQO-nyń ishki ister organdarynda soǵystan keıin 771 maıdanger qyzmet etti

PETROPAVL. QazAqparat – Soltústik Qazaqstan oblysynda polıtseıler maıdanger Fedor Şeglovqa 9 mamyr kúnine oraı syılyq jasap, onyń úıiniń aýlasynda kontsert uıymdastyrdy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, óńirdiń ishki ister organdarynda Ekinshi dúnıejúzilik soǵystyń 771 ardageri eńbek etti. Alaıda olardyń birde biri Jeńistiń 77 jyldyǵyna deıin jete almady. Degenmen, polıtseıler bıyl da jyldaǵy dástúr boıynsha maıdangerlerdi quttyqtady. Mereke qarsańynda Petropavldaǵy Internatsıonal kóshesindegi úıdiń aýlasynda kontsert qoıyldy. Basty kórermen – maıdanger Fedor Şeglov boldy.

ІІ dárejeli Otan soǵysy ordeniniń kavaleri 95 jastaǵy Fedor Şeglov 1944 jyly ásker qataryna shaqyrylyp, tankıst bolyp qyzmet etken. «Kenıgsbergti basyp alǵany úshin», «Japonııany jeńgeni úshin» jáne ózge de medaldary bar.

Kontsert barysynda Petropavl qalalyq ardagerler keńesiniń tóraǵasy Imanǵalı Tatvaev sóz alyp, jyly lebizin bildirdi. Pogondaǵy ártister soǵys jyldarynda shyrqalǵan jáne kópshiliktiń súıikti fılmderinen tanys ánderin shyrqady. Sonyń ishinde «Eh, dorogı», «Smýglıanka» jáne basqalary bar, al Ashat Ǵaleev dombyrasymen «Semnadtsat mgnovenıı vesny» fılmindegi «Gde-to daleko» ániniń áýenin áserli oryndap berdi. Kontsert maıdangerdiń ǵana emes, sol mańda turatyn úılerdiń turǵyndarynyń da kóńilinen shyqty.

«Uly Otan soǵysynyń ardagerleri men tyl eńbekkerlerine qurmet kórsetý – urpaqtardyń qasıetti boryshy. Bizge beıbit zaman syılaǵan jaýyngerlerdiń erligi eshqashan umytylmaıdy. Polıtsııa qyzmetkerleri úshin Jeńis kúni – mańyzdy data. Óıtkeni, bul – elimizdi qorǵaý dástúriniń jáne ortaq Otanymyzda ómir súrip jatqan halyqtyń beıbit ómirin qamtamasyz etýdiń sabaqtastyǵyn bildiretin mańyzdy kún», – deıdi SQO PD Ardagerler keńesiniń tóraǵasy Aqan Syzdyqov.