SQO-nyń estý qabileti buzylǵan akterler teatry Dýbaıda gran-prı aldy

DÝBAI. QazAqparat – Soltústik Qazaqstan oblysynda estý qabileti buzylǵan akterler teatrynyń bıshileri Dýbaıdaǵy horeografııalyq óner festıvalinde gran-prı aldy. Bul týraly Mádenıet jáne sport mınıstri Ashat Oralov jazdy, dep habarlaıdy QazAqparat.

Sensitive bı teatry Petropavldaǵy «Estý qabileti buzylǵan balalarǵa arnalǵan oblystyq arnaıy (túzetý) mektep-ınternaty» KMM bazasynda qurylǵan.

Halyqaralyq konkýrstarda debıýt jasaǵan oblystyq túzetý mektep-ınternatynyń tárbıelenýshileri birneshe nomınatsııa boıynsha jeńiske jetti. Atap aıtqanda, «solo» (Danıal Kangojın) jáne «dýet» (Evgenıı Kýzmın jáne Ekaterına Voropaeva) sanattarynda úzdik atandy.

Al mektep-ınternat tárbıelenýshileriniń aǵa quramy «Vena valsi» jáne «Samba» horeografııalyq qoıylymdarymen birinshi oryn aldy.

Sondaı-aq Sensitive teatry qazylar alqasynyń da arnaıy syılyǵyna ıe boldy.

«Men teatrdyń shyǵarmashylyq ujymyn jáne Soltústik Qazaqstan oblystyq arnaıy mektep-ınternatynyń túlekterin tolaıym tabystarymen quttyqtaımyn. Bul – otandyq ınklıýzıvti teatr men Qazaqstannyń teatr óneri úshin úlken jetistik. Sonymen qatar bul bizdiń erekshe qajettilikteri bar otandastarymyzdy shabyttandyratyn tamasha nátıje. Bul qandaı jaǵdaı bolsyn sizdiń shyǵarmashylyq áleýetińizdi júzege asyrýǵa bolatyndyǵynyń aıqyn dáleli. Teatrǵa bolashaq baıqaýlarda shyǵarmashylyq tabys pen jarqyn jeńister tileımin!», - dep jazdy mınıstr.