SQO-nyń eks-ákimi Sultanovtyń uıymdasqan qylmyspen baılanysy bar-joǵy tekserilýi múmkin

ASTANA. QazAqparat - Qazaqstannyń orys, kazak pen slavıan uıymdary úılestirý keńesiniń tóraǵasy, orystar qoǵamynyń basshysy, ataman ıÝrıı Zaxarov Soltústik Qazaqstan oblysyndaǵy aǵaıyndy Koshalevterdi aýyzdyqtaýdy surap otyr. Burynǵy ákim Erik Sultanovtyń da olarmen baılanysy bar bolýy múmkin deıdi. Bul ótinishin ol Qazaqstan xalqy Assambleıasynyń keńeıtilgen otyrysyna qatysqan QR Memlekettik qyzmet isteri men sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekpaevqa jetkizdi, dep xabarlaıdy QazAqparat tilshisi.

"Men ózim kásipkermin. Meniń jer ýchaskemde zańsyz bir ǵımaratty kóterip qoıǵan. Bas merdigeri - aǵaıyndy Koshalevter. 1998 jyldan beri olar uıymdasqan qylmystyq toptyń jetekshileri retinde tirkelgen. Osy jerde bir suraq týyndaıdy. Burynǵy ákim Sultanov pen Koshalevter arasynda qandaı baılanys boldy? Úsh jyl boıy ol uıymdasqan qylmystyq topqa arqa súıegen. Bul - úlken másele. Soltústik Qazaqstanda ónim óndirý kólemin eki ese artyq jazyp kelgen, bárin qoldan jasady. Al júz myńdaǵan jerlerge ónim egilmeı qaldy. Ol da mıllıardtaǵan aqshanyń kózi bolsa kerek. Osyny nazarǵa alýdy suraımyz. Kerek bolsa, arnaıy organdar men agenttik qyzmetkerlerin bettestirip, bárin ashyq aıtýǵa daıarmyz", - dedi Zaxarov.

Óz kezeginde QR Memlekettik qyzmet isteri men sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekpaev bárin óz kitapshasyna túrtip alyp: "Burynǵy ákimniń baılanysy bar deısiz, ónim kólemin qoldan ósirse, bárin teksereıik. Bizde ondaı múmkindik bar. Men tapsyrma beremin. Sosyn bárin tekseretin bolamyz. Sizge jazbasha túrde jaýap beremin", - dedi.

Ataman Zaxarovtyń aıtýynsha, buǵan deıin ol Bas prokýrordyń orynbasary Iogan Merkelge xat jazǵan. Alaıda aǵaıyndy Koshalevter onyń ústinen aryz túsirip úlgergen. Sodan ol bir jyl boıy áýre-sarsańǵa tústi, tergeýge alyndy. Alaıda oǵan qatysty kúdikter dáleldenbedi. "Endi, men jemqorlyqqa qarsy agenttiktiń kómegin kóreıin dep edim", - deıdi Zaxarov.

Aıta keteıik, QR Memlekettik qyzmet isteri jáne sybaılas jemqorlyqqa qarsy is-qımyl agenttigi Qazaqstan xalqy Assambleıasymen birlese otyryp, xalyq arasynda sybaılas jemqorlyqqa qarsy mádenıetti qalyptastyrýdy kózdeıdi. Osyǵan oraı, búgin memlekettik organ men qoǵamdyq uıym arasynda ózara áriptestik týraly memorandýmǵa qol qoıylyp, birlesken is-sharalar jospary bekitildi .