SQO-nyń delegatsııasy Lenıngrad oblysyna týǵan jerdiń topyraǵy salynǵan kapsýlany aparady

PETROPAVL. QazAqparat – Soltústik Qazaqstan oblysynyń delegatsııasy Lenıngrad oblysynda maıdan dalasynda tabylǵan jaýyngerler súıegin qaıta jerleý rásimine qatysý úshin jol júredi. Olar týǵan jerdiń topyraǵy salynǵan arnaıy kapsýlany ala barmaq, dep habarlaıdy QazAqparat tilshisi.

Reseı Federatsııasynyń Lenıngrad oblysynyń Svırstroı qalalyq qonysynyń mańynda Ekinshi dúnıejúzilik soǵysta qaza tapqan 55 qazaqstandyq jaýyngerdiń súıegi tabyldy. Ony «Eske alý vahtasyna» qatysyp, osy arada qazba jumystaryn júrgizgen «Pereprava» izdeý otrıady qazyp alǵan bolatyn.

Bul jaýyngerlerdiń Petropavlda 1941 jyly qurylǵan 314 atqyshtar dıvızııasy quramynda soǵysqandyǵy anyqtaldy. Olardyń onnan astamy maıdanǵa Soltústik Qazaqstan oblysynan shaqyrtylǵan eken. Jaýyngerlerdiń aty-jóni, týǵan jeri jazylǵan qujattar tabyldy. 26 qazan kúni Lenıngrad oblysynda tabylǵan jaýynger súıekteri qaıta jerlenbek. Aza tutý rásimine qatysý úshin, jaýyngerlerdiń zıratyna týǵan jerdiń topyraǵyn salý úshin SQO-dan arnaıy delegatsııa barady.

«Lenıngrad oblysynyń Svırstroı eldi mekeniniń mańynda qandy urystar bolǵany belgili. Jaýmen shaıqasyp, Otan úshin soǵysqandardyń qatarynda jerles jaýyngerler kóp bolǵan. Tabylǵan 55 adamnyń 10-ynyń bizdiń óńirden ekeni anyqtaldy», - deıdi Petropavl qalasy ákiminiń orynbasary Asqar Habıbýlın.

Delegatsııa quramyna jaýyngerlerdiń týystary, ardagerler keńesiniń músheleri kirgen. Petropavldaǵy 314 atqyshtar dıvızııasy eskertkishiniń mańyna jınalǵan halyq olardy jolǵa saltanatpen shyǵaryp saldy.