SQO-nyń Bas krımınalısi qaraqshylardy ózdigimen ustap, qylmysty ashty
SQO Polıtsııa departamenti baspasóz qyzmetiniń málimetinshe, Qyzyljar aýdanyndaǵy Sokolovka eldi mekeni mańyndaǵy janar-jaǵarmaı quıý beketine qaraqshylyq shabýyl túngi saǵat 2.00 shamasynda jasalǵan. Medıtsınalyq maska kıgen eki adam stansaǵa basa-kóktep kirip, bireýi kassırge keńselik pyshaqty sermep, aqsha talap etken.
47 jastaǵy áıel qaskóıge barynsha qarsylyq kórsetip, sytylyp shyqqan. Ol kórshi turǵan gaz quıý stansasyna qaraı qashyp, sol jerde polıtsııaǵa habarlaǵan. Qylmyskerler tártip saqshylary kelgenshe kassadaǵy 270 myń teńgeden astam somany qoldy etken.
Qylmysty ashý úshin oblystyq Polıtsııa departamentiniń jedel ýákilderi tartyldy. Qaraqshylyq shabýyl jasaý kezinde kózge túsken shetel kóligindegi eki er adam tekserildi. Alaıda kúdik rastalmady.
Saǵat 4:30 shamasynda SQO PD Krımınaldyq polıtsııa basqarmasynyń bastyǵy Petr Klımov aýyl mańyndaǵy tasjoldyń boıymen oblys ortalyǵyna qaraı jaıaý bet alǵan eki er adamdy baıqap qalǵan. Polıtsııa polkovnıgi kúdik týdyrǵandardy ustap, qaraqshylyq shabýylǵa qatystylyǵyn tekserý úshin oqıǵa ornyna ákeldi. Ustalǵandardyń sómkelerinen urlanǵan aqsha tabyldy.
Atalǵan derek boıynsha sotqa deıingi tergep-tekserý júrgizilýde. «Qaraqshylyq» baby boıynsha bes jyldan on jylǵa deıingi merzimge bas bostandyǵynan aıyrý jazasy qarastyrylǵan. Ustalǵandardyń ekeýi de 1991 jyly týǵan. Qazir olar Qyzyljar aýdany polıtsııa bóliminiń ýaqytsha ustaý ızolıatoryna qamaldy.