SQO-nyń barlyq aýdan ortalyqtarynda hokkeı korty ashylady

PETROPAVL. QazAqparat – Soltústik Qazaqstan oblysy Býlaevo qalasynda «Jastar» hokkeı korty paıdalanýǵa berildi. Bul – óńirde bıyl ashylyp otyrǵan osymen úshinshi sport nysany, dep habarlaıdy QazAqparat tilshisi.

SQO ákimi Qumar Aqsaqalov jańa nysannyń ashylý saltanatyna qatysty. Óńir basshysynyń aıtýynsha, mundaı zamanaýı hokkeı korttary barlyq aýdan ortalyqtarynda ashylmaq.

Bul óńirde hokkeıdi júıeli túrde damytýǵa múmkindik beredi.

Býlaevtaǵy jańa «Jastar» hokkeı korty «Batyr Baıan» sporttyq-saýyqtyrý ortalyǵy men jańa stadıonnyń janynda ornalasqan.

«Qys mezgilinde biz aýdandarda úshinshi hokkeı kortyn ashyp otyrmyz. Novoıshımka men Mamlıýtkadan keıin estafetany Býlaevo qabyldap aldy. Keshende aýdannyń 120 turǵyny sportpen aınalysady. Jańa kortta hokkeı sektsııasyna taǵy 100 adam tartylmaq. Short-trek úıirmesin de ashý josparlanǵan.

Taǵy 2 hokkeı kortynyń qurylysy jalǵasyp jatyr. Bıyl hokkeı ortalyqtarynyń jelisi aıtarlyqtaı ósedi. Taǵy 7 hokkeı kortyn salynady, Oǵan qajet qarajat bıýdjetke qarastyrylǵan. Osylaısha, hokkeı keshenderi búkil oblys boıynsha jumys isteıdi», - dedi Qumar Aqsaqalov.

Qazir SQO-da 2 891 sport nysandary bar.

Byltyr ǵımarattardy jóndeýge 2 ese kóp qarajat jumsaldy.

Jalpy bul salaǵa byltyr 6,1 mlrd teńge jumsalsa, bıyl ol 18,2 %-ǵa artqan.