SQO-nyń 15 aýylynda ákimderdiń orny bos

PETROPAVL. QazAqparat – Soltústik Qazaqstan oblysynda 12 aqpanǵa deıin túrli deńgeıdegi ákimder halyqpen jalpy sany 574 eseptik kezdesý ótkizedi, dep habarlaıdy QazAqparat tilshisi.

SQO ishki saıasat basqarmasynyń málimetinshe, bıyl óńirde túrli deńgeıdegi ákimder 574 ret halyq aldynda esep beredi. Pandemııaǵa baılanysty keıbiri onlaın formatta ótip jatyr. Ákimdikter halyqty neǵurlym kóp qamtý úshin kópke qoljetimdi ári tanymal áleýmettik jelilerdi qoldanbaq.

Mamandardyń aıtýynsha, eseptik kezdesýler 12 aqpanǵa deıin ótýi tıis. Osy kúnge deıin 544-i uıymdastyryldy.

Petropavl ákimi Bolat Jumabekov 5 aqpan kúni Fasebook, Instagram, YouTube áleýmettik jelileri jáne oblystyq «Qyzyljar» telearnasy arqyly saǵat 15.00-de eseptik kezdesýin bastaıdy. Al SQO ákimi Qumar Aqsaqalovtyń esebi 12 aqpanǵa josparlanǵan.

SQO memlekettik qyzmet isteri boıynsha departamenti baspasóz qyzmetiniń málimetinshe, óńirde 13 aýdandyq, 4 qala jáne 186 aýyldyq okrýg ákimi bar. 1 qańtar 2021 jylǵy jaǵdaı boıynsha 15 aýyldyq ákimniń orny bos tur.