SQO-nyń turaqtandyrý qoryndaǵy 19 túrli azyq-túliktiń 15-i óńirde óndiriledi
Oblystyq qoǵamdyq keńeste SQO kásipkerlik jáne ındýstrıaldy-ınnovatsııalyq damý basqarmasy basshysynyń orynbasary Qanat Shamsýtdınov azyq-túlik baǵasyn turaqtandyrý boıynsha atqarylǵan jumysqa esep berdi.
«Bıyl turaqtandyrý qoryn áleýmettik mańyzy bar azyq-túlikpen toltyrýǵa 2,5 mlrd teńge bólindi. 19 túrli ónimniń 15-in jergilikti sharýashylyqtar óndiredi.
«Soltústik» áleýmettik-kásipkerlik korporatsııasy» AQ shıkizatty satyp alý jáne ónimdi bólshek saýda jelisinde tómendetilgen baǵamen odan ári ótkizý úshin jergilikti taýar óndirýshilerge qaryz beredi. Sút jáne et ónimderi aýyl sharýashylyǵy taýaryn óndirýshilerden týra saýda oryndaryna jetkiziledi. Kásipkerlermen uzaq merzimdi kelisimder bar. Al kókónisterge keler bolsaq, sharýashylyqtarǵa «aınalym shemasy» jáne «forvardtyq satyp alý» aıasynda qarjy bólingen, olar kúz-qys mezgilinde qajetti ónimmen qamtıdy», - deıdi Qanat Shamsýtdınov.
Mamannyń aıtýynsha, saýda oryndarymen saýda ústemesiniń mólsherin saqtaý týraly memorandým jasalǵan.
«Kún saıyn baǵany kóterý faktilerine jol bermeý boıynsha azyq-túlik baǵasyna monıtorıng júrgiziledi. Jyl basynan beri 300-den astam aýyl sharýashylyǵy ónimderiniń jármeńkesi ótti. Kóterme saýda kásiporyndarynyń, saýda jelileriniń, dıstrıbıýterler men dúkenderdiń qatysýymen únemi deldaldyq shemalardy tergeý jónindegi komıssııanyń otyrystary ótkiziledi. Desek te, saýda qyzmetin retteý zańnamasyn buzatyndar bar, bıyl 128 saýda sýbektisi ákimshilik jaýapkershilikke tartyldy», - deıdi Qanat Shamsýtdınov.
Monıtorıng nátıjesinde ótken aptada SQO-da pııazdyń 9,9%, ıaǵnı 101 teńgeden 111 teńgege deıin jáne súzbeniń 3,6 % - 1566 teńgeden 1622 teńgege deıin qymbattaǵany anyqtalǵan. Al jumyrtqa 1,2% - 483-ten 477 teńgege, qant 417 teńgeden 407 teńgege deıin arzandady.
SQO-da azyq-túlik baǵasyn mólsherden tys ósirgender jazalanǵanyn jazǵan edik, 124-tiń 12-si mln teńgege jýyq aıyppul tólese, qalǵandary eskertý aldy.