SQO qylmystyq-atqarý júıesiniń qyzmetkerleri balalar úıiniń aýmaǵyn abattandyrdy
Departamenttiń jáne baǵynysty mekemeleriniń jeke quramy aldymen Petropavldaǵy balalar úıinde boldy. Bul mekemede ata-anasynyń qamqorlyǵynsyz qalǵan 4 jasqa deıingi sábıler tárbıelenedi. Jylda túrli syılyqpen keletin qyzmetkerler bul joly balalar úıiniń aýmaǵyn abattandyrý týraly sheshim qabyldady. Mamandar balalar alańyndaǵy átkenshekterdi syrlap, jóndep, aýmaqtaǵy shópti shapty, aǵashtardy aqtaýǵa kómektesti.
«Bul búldirshinder ana meıirimin kórmeı ósip keledi. Biz tátti syılyq ákelip, balalardy oınatyp, az da bolsa jylýlyq berýge tyrysamyz. Balalar úshin álem qazir ertegi sııaqty, olar armandap, onyń mindetti túrde oryndalatynyna senedi. Al, biz eresekter olardy osy senimnen aıyrmaı, qamqorlyq kórsete bilýimiz qajet», - deıdi SQO QAJD ES-164/3 mekemesi bastyǵynyń orynbasary Rústem Rahmetov.
Al, Petropavl probatsııa qyzmeti bóliminiń qyzmetkerleri esepte turǵandardyń balalaryna mereke uıymdastyrdy. Sýret baıqaýyn ótkizip, ártúrli oıyndar oınatty. Baıqaý sońynda balalardyń biri «Lezgınka» bılep, osylaı óz alǵysyn bildirdi. Búldirshinderge keńse taýarlary, táttiler men sharlar úlestirildi.
Sonymen qatar, ES-164/6 mekemesiniń qyzmetkerleri otbasylyq úlgidegi balalar aýylynda boldy. Tátti syılyqtar ákelip, kıim-keshek tartý etti. Onyń ishinde jazasyn ótep jatqan áıelderdiń balalarǵa arnaıy toqyǵan qolǵap, shulyqtary da bar.
Mereke kúni qyzmetkerlerdiń balalary da nazardan tys qalmady. SQO boıynsha QAJD mamandary balalarymen birge otbasylyq demalys uıymdastyrdy. Ásirese, búldirshinder ýaqytynyń kóp bóligin jumysta ótkizetin ata-analarynyń kúni boıy qastarynda bolǵanyna qýandy.