SQO qurylysshylary kúnine 90 myń teńge alyp júr me – vıtse-mınıstr jaýaby

ASTANA. QazAqparat – Eńbek jáne halyqtyń áleýmettik qorǵaý vıtse-mınıstri Oljas Ordabaev Soltústik Qazaqstan oblysynda qurylysshylarǵa kúnine 90 myń teńge aılyq tólenetini týraly ákimniń málimetine qatysty pikir bildirdi, dep habarlaıdy QazAqparat tilshisi.

«Ótken aptada Soltústik Qazaqstan oblysynyń ákimi qurylys salasynda kúnine 90 myń teńgeden aqsha tabýǵa bolatynyn aıtty. Bir sharshy metr kirpish qalaǵany úshin 18 myń teńge tólenetinin, salada tas qalaýshylar tapshy ekenin jetkizdi. Qarapaıym qurylys salasynda shynymen de osyndaı tabys tabýǵa bola ma? Álde, ákim asyra sóıledi ma?» - dep surady jýrnalıst ortalyq kommýnıkatsııalar qyzmetinde ótken brıfıngte.

Vıtse-mınıstrdiń aıtýynsha, eńbekke aqy tóleý máselesin naryqtyń ózi retteýi kerek.

«Bul máseleni memleket rettemeıdi, naryqtyń óz máselesi. Kirpish qalaý qyzmetiniń quny qansha bolatynyn memleket belgilemeıdi. Soltústik Qazaqstan bolsyn, basqa óńir bolsyn kez kelgen jumys túrine tólenetin aqy naryq arqyly retteledi. Bizge bul jerde qandaı da bir pikir bildirý qıyn», - degen Oljas Ordabaev ákim sózine kúmán keltirmeıtinin aıtty.

«Eger oblys ákimi óńirde qurylys kompanııalarynan sondaı usynys bar ekenin aıtqan bolsa, solaı shyǵar. Ol aqparatqa kúmándanýymyzǵa sebep joq. Bálkim, maman tapshylyǵyna baılanysty osylaı shyǵar. Ondaı usynys bar shyǵar», - dedi vıtse-mınıstr.