SQO: kásipkerden 50 mln teńge bopsalady dep aıyptalǵan blogerler aqtaldy

<p>PETROPAVL. KAZINFORM &ndash; Petropavlda kásipkerdi bopsalap, 50 mln teńge talap etti dep aıyp taǵylǵan blogerler kinásiz dep tanyldy. Bopsalaý isi boıynsha sot alqabıler alqasynyń qatysýymen ótken edi.&nbsp;</p>

Soltústik Qazaqstan oblystyq sotynyń málimetinshe, sottalýshylar S. jáne P. «T.» JShS-nde zań buzý faktilerin anyqtaý maqsatynda tekserýler júrgizýdi toqtatqany úshin, sondaı-aq kompanııanyń múddesine jáne iskerlik bedeline nuqsan keltirýi múmkin materıaldardy «Instagram» jáne «Youtube» jelilerinde odan ári taratpaǵany úshin «T.» JShS dırektorynan aı saıyn 200 myń teńge somasynda qarajat tóleýdi talap etkeni úshin aıyptalǵan.

Kompanııa dırektory I. bes aı ishinde sottalýshylarǵa qolma-qol jáne aýdarym arqyly 1 mln teńge somasynda aqsha tólegen.

Sondaı-aq, sottalýshylar keıinirek uıaly baılanys arqyly «M.» JShS basqarýshy dırektoryn da bopsalap, áleýmettik jelilerde osy kompanııaǵa qatysty jaǵymsyz materıaldardy odan ári taratpaǵandary úshin 50 mln teńge somasynda qarajat tóleýdi talap etkeni úshin aıyptaldy.

«M.» JShS óńirlik dırektory B. sottalýshylardyń birine 25 mln teńge somasynda aqshalaı qarajat berdi, onyń 5 mln teńgesi túpnusqa kýpıýralar, 20 mln teńgesi mýlıaj bolǵan.

Prokýror sottalýshylardyń árqaısysyn 10 jylǵa bas bostandyǵynan aıyrýdy surady. Qorǵaýshylar olardy aqtaýdy surady.

Nátıjesinde alqabılerdiń sheshimimen sottalýshylar olarǵa taǵylǵan is -áreketter dáleldenbegendikten, bopsalaý jasaǵany úshin kinásiz dep tanyldy.

Úkim zańdy kúshine engen joq.

Esterińizge salaıyq, oqıǵa byltyr qarasha aıynda bolǵan edi. Petropavldaǵy saýda jelileriniń biriniń dırektory eki blogerdiń ózinen aqsha bopsalaǵanyn aıtyp, aryzdanǵan. Uıymdasqan qylmysqa qarsy kúres basqarmasynyń qyzmetkerleri jedel is-shara barysynda jábirlenýshiden 50 mln teńge bopsalaǵan Petropavldyń eki turǵynyn ustady.