SQO kásiporny «Eńbek» baǵdarlamasymen mamandardy qaıta daıarlap jatyr
«Petropavl aýyr mashına jasaý zaýyty» AQ janynan oqý ortalyǵy byltyr ashyldy. Nátıjeli jumyspen qamtý jáne jappaı kásipkerlikti damytýdyń «Eńbek» memlekettik baǵdarlamasy aıasynda bıyl munda 16 adam dánekerleýshi mamandyǵy boıynsha qaıta oqýdan ótip jatyr. Úsh aıǵa shaqtalǵan kýrs barysynda tyńdaýshylar teo rııamen tanysyp, óndiristik tájirıbeden ótedi. Keıin bilimderin qorytyndylap, synaq tapsyrady. Bıyl úshinshi ret túlekterin shyǵarmaq.
Oqytý ortalyǵy jergilikti kásipkerler palatasymen, jumyspen qamtý basqarmasymen birge jumys isteıdi. Tyńdaýshylar Soltústik Qazaqstan kásibı-pedagogıkalyq kolledjde teorııalyq bilim alsa, óndiristik tájirıbeni kelisim boıynsha Petropavldaǵy birneshe kásiporynda ótedi.
«Bizdiń oqýshylarymyz kásiporyndarda basqalarmen teń dárejede jumys isteıdi. Osylaısha tájirıbe jınaqtaıdy. Ózderin jaqsy kórsetkenderi sol jerde eńbek etip qalýy múmkin. Biz túlekterimizdiń 60 % jumys taýyp berýge mindettimiz. Olar bul jerde tegin bilim alady», - deıdi «PAMJZ» AQ oqytý ortalyǵynyń jetekshisi Tatıana Chepýhına.
Oqytý ortalyǵy byltyr gaz-elektrdánekerleýshilerdi jáne baǵdarlamalyq basqarý mashınalarynyń operatorlaryn, frezerlik bildek mamandaryn daıarlady. 100-ge jýyq maman sertıfıkat alyp shyqsa, solardyń shamamen 70 % turaqty jumys tapqan.
«Bıyl oqý kýrstaryn indetke baılanysty kesh bastaýǵa týra keldi. Tyńdaýshylardy jumyspen qamtý ortalyǵy joldamamen jiberedi. Baǵdarlama aıasynda óz jumysshylarymyzdyń da bilimderin jetildirýge múmkindigimiz bar. Buryn olar dánekerleýshi bolyp eńbek etse, endi baǵdarlamamen basqarylatyn bildekterde jumys isteı alady», - deıdi Tatıana Chepýhına.
Oqytý kýrsynyń tyńdaýshylary 24 qyrkúıekten bastap emtıhan tapsyrady.