SQO halqy kóbine densaýlyq saqtaý jáne bilim salasynyń laýazymdy tulǵalaryna shaǵymdanady

PETROPAVL. QazAqparat – Soltústik Qazaqstan oblysynda bıyl 18 tártiptik is qaralǵan. Sonyń 9-ynda memlekettik qyzmetke nuqsan keltiretin teris qylyqtar jasaǵany úshin jáne 9-ynda memlekettik qyzmetshilerdiń Ádep kodeksiniń normalaryn buzǵany úshin qyzmettik tergeý júrgizildi, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken brıfıngte QR Memlekettik qyzmet isteri agenttigi SQO boıynsha departamentiniń basqarma basshysy Baqyt Janbolov ádep jónindegi keńesterdiń jumysy jaıynda aıtty.

Bıyl 18 tártiptik is qaraldy. Bul ótken jyldyń sáıkes kezeńimen salystyrǵanda 6 iske artyq.

14 laýazymdy tulǵa memlekettik qyzmetke nuqsan keltiretin teris qylyq jasaǵany jáne Ádep kodeksiniń normalaryn buzǵany úshin tártiptik jaýapkershilikke tartylsa, 4 tulǵaǵa qatysty tártiptik is toqtatyldy.

«9 aıdyń ishinde memlekettik qyzmet salasyndaǵy baqylaý basqarmasyna 113 ótinish kelip tústi. Departamenttiń quqyq buzýshylyqtardyń jolyn kesý boıynsha atqaryp jatqan profılaktıkalyq jumystaryna qaramastan keı memlekettik organdarda zańnama talaptaryn saqtaý boıynsha jaǵdaı ózgermeıdi, máselen qaralǵan 48 ótinishtiń 24-i, ıaǵnı jartysy rastaldy. Taldaý kórsetkendeı, basym bóligi laýazymdy tulǵalardyń is-áreketterine, sondaı-aq jergilikti atqarýshy organdar men olardyń qurylymdyq bólimsheleriniń zańsyz aktilerine qatysty. Shaǵym kóbine densaýlyq saqtaý jáne bilim berý salalaryna qatysty túsedi. Júrgizilgen tekserýler men qarastyrylǵan ótinishter aıasynda 11 adamnyń quqyqtary qalpyna keltirildi», - deıdi Baqyt Janbolov.

Memlekettik qyzmet salasyndaǵy baqylaý jelisi boıynsha esepti kezeńde memlekettik qyzmet týraly zańnamany saqtaý máseleleri boıynsha 9 tekserý júrgizildi, onyń barysynda 196 quqyq buzýshylyq anyqtaldy.

«Tekserý kezinde memlekettik qyzmetshilerdiń quqyqtaryn shekteıtin faktiler anyqtalady. Mysaly, zańnamaǵa sáıkes, memlekettik qyzmetshiler úzdiksiz oqytýdan ótýi qajet. Kóliktik baqylaý ınspektsııasynda qosymsha kásibı bilim alý úshin memlekettik qyzmetshilerdi oqytýǵa jibermeý faktileri tirkeldi. Taǵy bir mysal, tártiptik jaza qoldaný kezinde sanıtarlyq-epıdemıologııalyq baqylaý departamentinde memlekettik qyzmetshilerdi tártiptik jaýapkershilikke tartý kezinde olardyń quqyq kepildikteri saqtalmaǵan, bul da memlekettik qyzmet týraly zańnama normalaryna qaıshy keledi», - deıdi basqarma basshysy.

Baqyt Janbolovtyń aıtýynsha, memlekettik qyzmet salasyndaǵy baqylaý basqarmasy qyzmetiniń taǵy bir baǵyty - merzimnen tys jumys isteýdi joıý.

Kún tártibin saqtaý jáne merzimnen tys jumys isteý faktilerine jol bermeý maqsatynda memlekettik organdarda qoljetimdilikti esepke alýdy baqylaý júıesi ornatylyp jatyr.

Nátıjesinde 2019 jyldan bastap merzimnen tys jumys isteý 4 ese tómendegen.

Sonymen qatar, Departament qyzmettik avtokólikti qyzmetten tys maqsattarda paıdalaný máselesin turaqty baqylaýda ustaıdy.

Reıd barysynda jergilikti atqarýshy organdardyń basshylary nemese olardyń júrgizýshileri qyzmettik avtokólikti qyzmetten tys maqsattarda paıdalanatyny anyqtaldy.

Olar tártiptik jaýapkershilikke tartyldy.