SQO halqy 2 maýsymda Senat depýtatyn saılaıdy: 4 úmitker bar

PETROPAVL. QazAqparat – Soltústik Qazaqstan oblysynda Senat depýtatyn saılaý 2 maýsym ótedi. Ózin-ózi usynǵan 4 kandıdat tirkeldi, dep habarlaıdy QazAqparat tilshisi.

SQO-da Senatqa qaıta saılaý Gúlmıra Kárimovanyń mezgilsiz qaıtys bolýyna baılanysty ótedi.

SQO aýmaqtyq saılaý komıssııasynyń málimetinshe, óńirden QR Parlament Senatynyń depýtattyǵyna 7 adam kandıdatýrasyn usyndy.

Onyń biri tıisti zańnyń talaptaryna sáıkes kelmegendikten ótpeı qaldy. Bireýi saılaýǵa túsýden óz erkimen bas tartty.

Qujattardyń tolyq tizimin usynbaǵan taǵy bir kandıdat tirkeýden óte almady.

Nátıjesinde eki er adam jáne eki áıel tirkeýden ótti. Olar:

- Melehov Sergeı Vladımırovıch, 1987 jyly týǵan, SQO dene shynyqtyrý jáne sport basqarmasynyń basshysy. Ózin-ózi usynýshy.

- Kasenova Raýza Ivanovna, 1965 jyly týǵan, SQO din isteri basqarmasynyń basshysy. Ózin-ózi usynýshy.

- Ásem Qalashbaıqyzy Rahmetova, 1980 jyly týǵan, «AMANAT» partııasy«QB SQO fılıalynyń tóraǵasy. Ózin-ózi usynýshy.

- Anatolıı Bronıslavovıch Rafalskıı, 1955 jyly týǵan, Qazaqstannyń Astyq Konsortsıýmy dırektorynyń orynbasary. Ózin-ózi usynýshy.

Al 21 mamyr jeksenbi kúni 5 aýdanda, 7 aýyldyq okrýgte aýyl ákimderiniń saılaýy ótedi.