SQO ǵalymdary baldyrdan taǵamdyq qaptamalar jasap shyǵardy

<p>PETROPAVL. KAZINFORM &ndash; Petropavldaǵy Kozybayev University ǵalymdary 1,3 mln teńge grant jeńip alyp, ekologııa úshin mańyzdy jobany qolǵa aldy.&nbsp;</p>

M. Qozybaev atyndaǵy Soltústik Qazaqstan memlekettik ýnıversıteti baspasóz qyzmetiniń málimetinshe, jergilikti ǵalym men onyń stýdentterine kópten oıda júrgen jobany júzege asyrýǵa jasyl zertteý ınnovatsııalyq jobalardy qoldaıtyn Sustainability Living Lab baǵdarlamasy kómektesken. Osylaısha ýnıversıtet National Conservation Initiative korporatıvtik qorynan jáne Nazarbaev ýnıversıtetinen 1,3 mln teńge grant aldy.

Joba avtory - agrotehnologııalyq fakýltetiniń aǵa oqytýshysy Elena Il.

Foto: Kozybayev University baspasóz qyzmeti

«Taqyryp - «Kappa-karragınandy qoldaný arqyly bıologııalyq ydyraıtyn taǵamdyq qaptama óndirý tehnologııasyn ázirleý» dep atalady. Qarapaıym tilmen aıtqanda teńizdiń qyzyl baldyrlarynan jasalǵan taǵamdyq qaptama.

Bul ekologııa úshin óte mańyzdy joba. Jalpy, karragınan degenimiz - teńizdiń qyzyl baldyrlary ekstraktsııasynan alynǵan tabıǵı gel.

Tájirıbelik zertteýlerden keıin quramyn jasap shyqtyq. Mundaı tabıǵı qaptamany sýsymaly, qurǵaq jáne basqa da tamaq ónimderin oraýǵa, qaptaýǵa bolady», - deıdi ýnıversıtettiń aǵa oqytýshysy Elena Il.

Qarajatqa tabıǵı qaptamany óndirýge múmkindik beretin jabdyqtar men materıaldar satyp alyndy.

«Karragınan qaptamasynyń qazirgi qoldanystaǵy tsellofan qaptamalardan ereksheligi – ol sýda jarty saǵat ishinde tolyǵymen ydyrap ketedi jáne ekologııalyq taza. Azyq-túlikke áser etpeıdi, qorshaǵan ortany saqtaýǵa, qaldyqtardy kádege jaratý máselesin sheshýge múmkindik beredi. Jobaǵa Arızona ýnıversıtetimen halyqaralyq bilim berý baǵdarlamasy boıynsha oqyp jatqan stýdentter de belsendi qatysyp jatyr», - deıdi Elena Il.

Alda joba avtorlary óndiris tehnologııasyn jetildirýmen, qaptamanyń beriktigin arttyrýmen aınalysady.

Sondaı-aq, ázirlemege patent alýdy da josparlaǵan.